Ƀộ Bơto bơtê mờ Bơsram rơp bơcri priă tơnguh cồng nha bơto bơsram tiah Tây Nguyên
Thứ tư, 08:42, 11/06/2025 Cau mblàng: K’Duẩn/VOV Tây Nguyên Cau mblàng: K’Duẩn/VOV Tây Nguyên
VOV4.K'Ho - Mờ jơnau kờñ tơnguh bơta niam cau lơh broă, gàr bơta ring bal tàm broă bơto bơsram tơl nă làng bol in, kuơmàng là oh kòn làng bol jơi bơtiàn dồ êt nă cau, Đảng mờ Dà lơgar neh geh uă jơnau lơh nền, broă lam lơh lài bơtàu tơnguh bơto bơsram tàm tiah sar lơgar ngài, tiah uă kal ke bè Tây Nguyên. Pơrjum “Bơta geh ngan bơto bơtê mờ bơsram tiah Tây Nguyên mờ tă pơgồp jơnau đơs tàm jơnau rơcang cih jơnau lơh nền tơnguh bơta niam bơto bơtê mờ bơsram ai làng bol kòn cau Tây Nguyên in” bơh Ƀộ Bơto bơtê mờ Bơsram bơyai lơh tàm càr Dăk Lăk pa do là cơng tàng loh làng ngan ai bơta sền gròi hơ̆ in.

Jat Ƀộ Bơto bơtê mờ Bơsram, nam bơsram 2024 – 2025, jơh gùt tiah Tây Nguyên geh rlau 4 rbô 500 hìu bơsram bơh mầm non tus kao đẳng, đại họk mờ mờr 1 tơlak 500 rbô nă kơnòm bơsram bơh mầm non tus kâp pe. Ală hìu bơsram 3 kâp ơm rah rài làm gùt ală tiah, drơng jơnau kờñ bơsram sră bơh kơnòm bơsram mờ bơto bơtê wơl dê; ală hìu bơsram kòn cau ơm tơn geh rơndap lài, drơng jơnau kờñ bơto bơtê cau lơh broă jơi bơtiàn dồ êt nă cau. Ală tiah ai bơh 205 kes priă nàng bơcri bơto bơsram in, mờ kung hòi jà bơta tă pơgồp bơh mpồl bơtiàn nàng bơtàu tơnguh bơto bơsram.

Bulah bè hơ̆, Bơto bơtê mờ Bơsram Tây Nguyên kung gam uă bơta ờ niam, bal mờ cồng nha bơsram ờ hềt geh jat bè bơta kơp kờñ; khà hìu bơsram tơl khà tàm jơh ală kâp bơsram gam lơyah, khà phan bơna măi mok drơng jơnau kờñ pal geh tàm ală kâp bơsram ờ hềt uă, khà pơgru tơl khà rlau hơđang tàm ală kâp bơsram ndrờm lơha rlau mờ khà kờp bal gùt lơgar. Khà pơgru gam ờ tơl pơndrờm mờ khà geh ai; ală gùng dà broă lơh, bơta dong kờl ờ hềt ngan ngồn lơh geh cồng nha, lơh gơ rềng uă ngan tus broă tơnguh cồng nha bơto bơsram bơh tiah do dê.

Tềng đap bơta geh ngan do, Ƀộ Bơto bơtê mờ Bơsram neh bơt bơtàu jơnau lơh nền “Tơnguh cồng nha bơto bơtê mờ bơsram ai tiah làng bol kòn cau Tây Nguyên in” mờ jơnau kờñ tus nam 2030, bơto bơtê mờ bơsram jơh gùt tiah do geh tam gơl pa jat gùng dà tơl khà, lơh pa jơh; dong tơl nă làng bol ndrờm geh bơto bơtê geh cồng nha, lơh jat jơnau sồr bơtàu tơnguh bơh tiah do dê tàm tŭ tơngai pa.

Tàm pơrjum, ală cau ala mat neh tơrgùm cribơyai bè broă lam lơh tàm ù tiah he dê; mờ kung ai tơlik ală broă lơh nàng kờñ tă pơgồp jơnau đơs tàm jơnau rơcang cih jơnau lơh nền bơh Ƀộ Bơto bơtê mờ Bơsram dê. Hơ̆ là sơlơ tơnguh tai broă lơh đơng lam, sồr lơh bơh ală kâp dê tàm broă lơh geh bơtàu tơnguh bơto bơsram; tam gơl pa broă lơh bơto bơtê mờ bơsram; lam lơh geh cồng nha broă bơto dà kòn cau; ai tơlik ală broă lơh gơ hòi gơ jà cau pơgru lơh broă tàm tiah kal ke…

Đơs bè bơta geh ngan bơcri priă lơh kơ̆ hìu bơsram, ồng Lê Bá Cường, Phó Kwang Lam bồ Sờh Bơto bơtê mờ Bơsram càr Dăk Nông đơs là; broă rơndap ù tiah lơh hìu bơsram là bơta lài ngan nàng lơh kơ̆ hìu bơsram, ơdŭ bơsram: “Bè phan bơna den pal geh jơnau lơh nền is ồn ai tiah Tây Nguyên in, halà dilah tàm ală Broă lơh jơnau kờñ dà lơgar den kung pal đal git khà nđờ bơnah rhiang nàng bơcri priă ai phan bơna lơh kơ̆ kơljap hìu bơsram, ơdŭ bơsram in. Tàm hơ̆ geh đơs loh broă dong kờl ai cau pơgru in geh hìu ơm, anih ơm bal là dùl tàm ală broă lơh nàng bơsong broă cau pơgru gŏ tiah ngài den sang tĕ tơn tài ờ geh hìu ơm, ờ geh anih ơm ơpah den khi ờ bài ơm bơto tàm hìu bơsram”.

Ai ồng Lưu Tiến Quang, Phó Kwang lam bồ Sờh Bơto bơtê mờ Bơsram càr Dăk Lăk den pà git, Dăk Lăk geh rlau 1 tơlak 900 rbô tơlak nă làng bol mờ 49 jơi bơtiàn ơm kis bal, làng bol jơi bơtiàn dồ êt nă cau geh rlau 30%. Nàng tơnguh cồng nha bơto bơsram, pal sơlơ tơnguh rlau tai hìu bơsram ơm tơn, ơm sa ngai; geh broă lơh dong kờl nàng gơ hòi gơ jà pơgru, rề ơnàng kơnòm bơsram geh dong kờl; pơgồp bal mờ ală mpồl lơh broă, cíñ trị - mpồl bơtiàn, kuơmàng là tơnguh gơnoar broă cau kra ƀòn, cau atbồ ƀòn, cau geh bơngă pin dờn tàm ƀòn lơgar dê nàng tơnguh khà kơnòm bơsram lòt bơsram.

Ală cau ala mat kung geh jơnau đơs bè broă pal đal git loh cau mờ ù tiah ngui jơnau lơh nền, ơn tàm tŭ tơngai broă tơmut bal gam tơn jơh nhàr ù tiah mờ bơta geh ngan ù tiah krơi is gam geh lơh dê. Mò Vũ Thị Ánh, Phó Lam bồ Vụ Bơto bơsram pe kâp pà git, ală jơnau đơs tă pơgồp tàm pơrjum là bơnàng jă kuơmàng nàng mpồl cih gơs in pơn jat tai bơ tơl, lơh sir ală tơngume bơh jơnau lơh nền dê, lài mờ tŭ lam lơh ală broă pơn jat tai nàng yal Cíñ phủ in sền sơ wì, ring bal: “Jơnau đơs tă pơgồp bơh ală oh mi bơh ală Sờh Bơto bơtê mờ Bơsram dê yal jơnau tơnggit kuơmàng ngan nàng Mpồl cih jơnau rơcang cih bol hi in gơtùi cih dờp, bơ tơl tàm ală bơnah sền sơ wì bơta geh ngan kung bè ai tơlik ală broă lơh tàm tơngai tus nàng lơh geh jơnau kờñ ai tơlik, kuơmàng là ală broă mờ Đảng, Dà lơgar sền gròi ngan tàm broă bơto bơtê mờ bơsram tiah Tây Nguyên bè tơn jơh bơta ờ git sră, bơto wơl sră mờ khà hòi jà kơnòm dềt lòt bơsram, ngan là ală oh dềt jơi bơtiàn dồ êt nă cau tàm ală tiah sar lơgar ngài; pơgồp bơnah tơnguh bơta niam cau lơh broă ai tiah Tây Nguyên in”.

Pơrjum “Bơta geh ngan bơto bơtê mờ bơsram tiah Tây Nguyên mờ tă pơgồp jơnau đơs tàm jơnau rơcang cih Jơnau lơh nền tơnguh cồng nha bơto bơtê mờ bơsram ai làng bol kòn cau Tây Nguyên in” neh ai tơnggŏ bơta sền gròi uă ngan bơh Ƀộ Bơto bơtê mờ Bơsram dê, bal mờ ală càr tàm tiah rơhời tă bơsong ală kal ke, bơta ờ niam gam geh tàm gah bơto bơsram tàm ù tiah gam uă bơta lòng do. Ală jơnau đơs jơh nùs, di mờ bơta geh ngan bơh ală cau ala mat dê là jơnau tơnggit kuơmàng dê nàng lơh sir jơnau lơh nền, wèt tus jơnau kờñ tus nam 2030, bơto bơsram Tây Nguyên ngan ngồn geh tam gơl pa, lơh jat jơnau sồr bơtàu tơnguh kơ̆ kơljap jŏ jòng sùm, ring bal mờ tơl làm ai tơl nă làng bol in – ngan là oh kòn làng bol jơi bơtiàn dồ êt nă cau.

Cau mblàng: K’Duẩn/VOV Tây Nguyên

Viết bình luận

TIN CÙNG CHUYÊN MỤC