Càr Gia Lai gam lơh pràn rơndăp tăp sèng mpồl lơh broă sră nggal gơnoar atbồ kấp sàh jat gùng dà tơrmù di pal, tơrmù bơh 218 gơmù gam 77 mpồl lơh broă, lơh geh bơnàng jă ai gơnoar atbồ 2 kấp in lơh broă gơtùi mờ geh cồng nha. Jat Ală Jơnau neh lơh nền neh geh ring bal, broă lơh gơnoar atbồ kấp sàh pa bơh Gia Lai dê geh cau lơh broă sa priă nhai kờp bal 32 nă cau tơl sàh (ờ geh bal Mpồl Đảng, mpồl cau).

Mpồl kwang đơng lam bồ kấp sàh pa ngui broă lơh pa ndrờm mờ kấp kơnhoàl tŭ do dê. Jơh gùt mpồl cau lơh broă sa priă nhai kấp kơnhoàl tŭ do rơ̆p geh ntrờn rê kấp sàh pa nàng lơh bơta tờm ai mpồl lơh broă in, nàng kờñ sơlơ tơnguh bơta pràn jak lơh broă. Drờm mờ tơrmù di pal mpồl lơh broă, càr kung lơh mhar kờp sền mờ rcang broă lơh bơsong phan bơna dà lơgar dê tơnơ̆ tŭ tơmŭt bal. Ồng Đỗ Việt Hưng- Kwang lam bồ Sờh Priă jền càr Gia Lai pà gĭt, Sờh gam pơgồp bal mờ ală tiah nàng kờp sền jơh jơ tài phan bơna Dà lơgar dê mờ kờp dŭ kes priă Dà lơgar, bơt bơtàu broă lơh bơsong di pal.