Yal mờ Tổng Ƀí thư, 3 càr ndrờm jơh nùs lam lơh jat niam ală gùng dà broă lơh dờng bơh Dà lơgar dê bè Jơnau lơh nền tàm pơrjum sồ 60, Jơnau sồr sồ 45, Jơnau đơs pơndŭt sồ 150... bè rơndăp tăp sèng mpồl lơh broă sră nggal gơnoar atbồ kấp càr, tơrmù di pal mpồl lơh broă, rcang ai pơrjum dờng Đảng ală kấp. Ală jơnau neh lơh nền tơmŭt bal càr, ờ rơndăp broă kấp kơnhoàl, bơt bơtàu gơnoar atbồ ƀòn lơgar 2 kấp geh lam lơh niam ngan.

Tổng Ƀí thư đơs loh, gùng dà broă lơh tơmut bal 3 càr nàng lơh geh càr Lâm Đồng pa là gùng dà broă lơh dờng, gơ cèng bơta kwơ màng mờ gơ cèng bơta ờ gơtùi pleh klàs nàng kờñ tơnguh uă bơta gơ tùi lơh broă, lơh broă geh cồng nha atbồ. Broă tơmŭt bal ală anih lơh broă, rơndăp broă lơh pal geh lơh jak chài, song dơ pă, yal loh làng, di pal ngan. Pal ai nùs nhơm bơta pràn jak, bơngă pin dờn, geh cồng nha lơh broă lơh bơta đo was uă ngan rlau jơh tàm rơndăp kwang bàng. Mơkung pal jơh nùs sền gròi tus broă lơh, broă dong kờl ai kwang bàng tàm mpồl tơrmù di pal in, ơm rlô jat broă dong kờl, tàm pơdar lơh broă. Tơl broă lơh pal jat tàm nùs nhơm niam ngan, geh kơnòl, di pal ngan mờ di mờ jơnau cih dê.