Tàm dơ̆ tìp, Thủ tướng Cíñ phủ ồng Phạm Minh Chính đơs nền lơgar Việt Nam sền kwơ bơta git gơ̆p lơh bơyô bal mờ lơh broă bal uă gah broă mờ lơgar Costa Rica. Thủ tướng ồng Phạm Minh Chính sồr bàr lơgar pơn jăt tai tơnguh nùs nhơm pin dờn cíñ trị bơh broă tàm pơgơl mpồl ală kấp, tàm hơ̆ uă ngan là kấp dờng, pơlam cíñ trị; pờ ơnàng lơh broă bal lơh sa, lơh pràn kă bro phan đah bàr lơgar, tìp bal bơta niam chài mờ tơrbŏ bal làng bol.

Bàr Kwang đơng lam bồ ring bal sồr ală ƀộ, gah lơh broă gơrềng bal bơh bàr lơgar pơgồp bal jòi sền ală gùng dà broă lơh pa, ală broă lơh nàng lơh pràn lơh broă bal, kă bro phan, bơcri priă bal đah bàr lơgar tàm tơngu me bơta geh mờ bơta kờñ bơh bàr gah dê. Đơs niam ală bơta geh lơh broă bal đah lơgar Việt Nam mờ lơgar Costa Rica tàm ală gah broă: lơh sa suơn sre, lòt nhơl, lơh phan ngui sa, lơh sa mờ măi mok phần mềm, tam gơl sồ, bàr kwang đơng lam ring bal bàr lơgar pal tơnguh lơh broă bal tàm ală gah broă do.