Trồ mìu nisơna tàm tiah nhàr lơgar Dăk Nông pa jơh, 4 nă Kwang àng sàh Quảng Trực, kơnhoàl Tuy Đức pơn jat tai tus tiah lơh hìu bal mpồl lơh hìu, dong kờl dùl hìu bơnhă tàm ƀòn Bu Prăng 1A. Thiếu tá Nguyễn Văn Dũng, Phó Lam bồ Kwang àng sàh Quảng Trực pà gĭt, nàng gàr niam tŭ tơngai mut lơh, bơta niam mờ bơta kơ̆ kơl jap jŏ jòng bơh ală hìu ơm dong kờl làng bol in, mơkung gàr niam lơh jat kơnòl broă sền gàr lơngăp lơngai rơndăp tăp sèng tàm ù tiah do dê, jơh 31 nă kwang bàng, cau ling bơh mpồl lơh broă dê neh tàm pơdar bal dờp lơh broă tàm tiah lơh broă.

Thiếu tá Nguyễn Văn Dũng, đơs:“Kwang àng sàh neh tàm pà kơnòl broă ai tơl mpồl in gĭt loh ală mpồl lơh hìu jat tơl tiah thôn, ƀòn geh ală hìu bơnhă rƀah, hìu bơnhă pa lik klàs rƀah dờp broă lơh tơn jơh hìu lơh ing hìu ồm sèt nhăt dà mìu. Oh mi bol añ jat nền mờ jơnau kờñ “3 kră” geh: Kơlik hìu kră, bơnàng kră mờ rơkàng hìu kră gàr niam ờ gơtìp nhăt dà mìu. Bè tŭ tơngai mut lơh, tam pà mpồl lơh broă jat sền ală mpồl, mpồl lơh hìu mờ sồr khi pal lơh di mờ jơnau sồr dê”.

Bi Thị Thướt, 36 sơnam, kòn cau M’nông, ơm tàm ƀòn Bu Prăng 1A, là mè ròng is 2 nă kòn dềt. Bơklau chơ̆t gờñ tài bơh kòp kơn jơ̆, dồ nă să bi lơh ngan drơng hìu bơnhă mờ 2 sào kơphê mờ broă lơh ơpah tŭ geh tŭ ờ. 3 nă mè mờ kòn ơm ing tàm dùl nơm hìu ndàp neh yau bơh ồng mò đah mè dê lời wơl, ơnàng ờ hềt tơl 20 thơk vuông, kơlik hìu neh ồm lề, sơlo neh sĕk sa lơm. Pa do, bi Thướt là dùl tàm mờr 10 hìu bơnhă tàm ƀòn geh dong kờl hìu ơm. Bi Thướt pà gĭt, geh dong kờl hìu ơm, mè kòn bi gŏ gơ lơh bơtoah ngan:“Bơklau añ chơ̆t nam 2023, dùl nă añ pal rcang ai 2 nă sau in, rài kis kal ke ngan, hìu bơnhă añ là hìu bơnhă rƀah ngan rlau jơh tàm ƀòn dê. Geh gah Kwang àng dong kờl lơh hìu ơm 3 nă mè mờ kòn añ chờ hờp ngan. Tus do mut ơm hìu pa añ ờ gam kơlôi nhăt dà mìu, càl mut tàm kàl mìu, trồ tơngai kơmbuh, duh tàm kàl prang tai. Tŭ do añ mìng iang nùs lơh mìr, lơh broă apah ròng ală oh kòn bơsram sră lơm. Ưn ngài Ƀộ Kwang àng, ală kấp gah broă, ƀòn lơgar dê”.

Lơh jat broă lam lơh bơh Cíñ phủ dê bè tơn jơh hìu lơh ing, hìu ồm sèt nhăt dà mìu, hìu bơnhă pa lik klàs rƀah mờ hìu bơnhă geh sră dong kờl Dà lơgar, jơi bơtiàn dồ ết nă cau, bơh nam 2024 tus tŭ do, Ƀộ Kwang àng neh tă pơgồp, hòi jà lơh gĭt nđờ rơbô nơm hìu tàm ală càr tàm tiah Tây Nguyên.

Mìng is tàm càr Dăk Nông, nam 2025 geh 500 nơm hìu geh tam pà mờ priă tă lơh 30 tơmàn đong jàu Kwang àng càr in lơh jat. Tơnơ̆ tŭ dờp priă jền, Kwang àng càr Dăk Nông tơnggơs 5 mpồl lơh broă bơh Mpồl Kwang Lam bồ đơng lam tơn, lam lơh broă lơh tàm pơrlòng 56 ngai mang bơh ngai 12 nhai 5 tus ngai 30 nhai 6 lơh sir.

Jat Kwang àng càr Dăk Nông, bulah tŭ tơngai lam lơh uă geh bơyai lơh tàm tơngai kàl mìu, lơh uă bè bơt bơtàu den tàng broă jòi cau bơt hìu jat sră pơrgon kung kal ke ngan sơl, giă ală phan bơna bơt bơtàu, ngan là bràs bơt bơtàu gơguh uă mờ ờ hoan geh ngan... Mờ bơta đơng lam jơh nùs, kràñ cê jơh nùs bơh Đảng ủy, đơng lam bồ Kwang àng càr, bơh ală mpồl lơh broă, bơta mut lơh bal kràñ cê jơh nùs bơh jơh ală anih lơh broă cíñ trị bal mờ bơta lơh ngan, jơh nùs cíñ trị uă ngan rlau jơh bơh mpồl Kwang àng gùt càr dê, tàm hơ̆ geh gơnoar broă tờm Kwang àng kấp sàh, tơnơ̆ pơgăp 3 poh lam lơh, jơh 500 nơm hìu neh geh sơnđờm mut lơh, rlau 100 nơm hìu neh lơh sir, lơh geh rlau 30% mpồl broă.

Đại tá ồng Trần Văn Dũng, Phó Lam bồ Kwang àng càr Dăk Nông đơs uă broă lơh neh geh lam lơh nàng sơr lèt gan ală bơta kal ke tàm tơngai lơh jat; mpồl lơh broă kung gam kràñ cê jơh nùs lơh sir lài mờ ngai 20 nhai 6, sơr lèt tŭ tơngai mut lơh 10 ngai:“Bơta ờ hoan geh bràs, bol añ neh jàu ai tơl mpồl lơh broă ờs mờng in, Kwang àng ală sàh, hòi jà đại lý, ală mpồl lơh broă dong kờl ờ sa priă cồng. Khi kung gĭt wă mờ dờp sơl, tài do là broă lơh dong kờl cau rƀah in. Mpồl Lam bồ kràñ cê jơh nùs ngan hòi jà jơh ală kwang àng sàh; cribơyai tus Anih duh broă Làng bol ală sàh hòi jà cau rềp mềr bal, ală mpồl lơh bal dong kờl lơh hìu ai ală hìu bơnhă in dờp geh. Pơn yơu, tŭ khi ờ tơl cau dong kờl tă sờr hìu yau, bol añ hòi jà oh mi tus bal tui; ờ tơl cau lơh, bol añ kung rơ wah kwang bàng, cau ling gĭt broă lơh dong kờl tus bal”.

Ală hìu ơm kơ̆ kơl jăp gam rơ hời geh tàm kàl mìu Tây Nguyên dê ờ mìng là tiah ơm kis lơngăp lơngai ai ală hìu bơnhă rƀah in lơm, mờ gam là cơng tàng niam ngan ai nùs nhơm “Tài làng bol drơng broă” bơh mpồl Kwang àng dê. Bơh gùng dà broă lơh dờng bơh Cíñ phủ dê tus lơh broă ngan ngồn, geh ngan bơh Ƀộ kwang àng mờ Kwang àng càr Dăk Nông dê, broă lơh tơn jơh hìu lơh ing, hìu ồm sèt nhăt dà mìu neh ngan ngồn lơh gơrề uă bơta ram mhŭ nùs nhơm kòn bơnus, sòl àng bơta pin dờn tàm dùl rài tơnơ̆ do kơ̆ kơl jap mờ niam bơnĕ rlau tai ai làng bol tiah sar lơgar ngài mờ tiah nhàr lơgar dê in. Tơl nai găc, tơl hìu ơm ờ mìng bơt geh mờ vôi lơm mờ gam mờ bơta nđàc, kơnòl broă mờ jơh nùs lơh ngan lòt bal mờ làng bol tàm gùng lòt tơrmù rƀah, iang nùs tiah ơm kis mờ lơh broă.