Tàm jơnang geh uă ngan bơta àng gơcrà, ală muh măt sền bơnĕ bơnài àng gơcrà bal tàm ală phan soh. Bŭ lah oh tĭ tồr, bŭ lah kòn dềt tự kỷ, ndrờm geh nùs nhơm chờ hờp tàm Satềp bơh ală kơnòm dềt dê. Đah ngkời ală tŭ chờ tàm jơnang đơs crih do, là geh uă ngan nùs nhơm kờñ gơboh mờ broă lơh ngan ơ̆t ơl bơh ală pơgru dê. Pơgru Phan Thị Lệ, bơto ơdŭ kơrian gờñ ngoh rơngăc pà git: “Tài ală oh ờ kơno săp đơs crih den tàng ală pơgru pal tàp ală broă lơh tờm, tơnơ̆ mờ hơ̆, hơ̆ sồng tơrgùm bal mờ jơnau đơs crih mờ tŭ tơrgùm bal mờ jơnau đơs crih den pơgru pal sồr mờ să mờ tê lơh jăt bal nàng ală oh đờm bal sơl mờ lơh jăt bal”.

Gơwèt mờ ală cau tamya dềt tàm jơnang đơs crih satềp trung thu tàm Anih tờm Dong kờl bơtàu tơnguh bơto bơtê tơrgùm bal kơnòm dềt koĕt kơl te càr Dăk Lăk yal, mang do kung geh uă nùs nhơm chờ hờp ngan sơl. Ală oh soh tàm să phan pa, geh bơka să hàng niam, mờ uă ngan là geh nùs nhơm kờñ gơboh, geh tus bal tàm ngai chờ Àng kơnhai ndar me. Tus chờ bal mờ ală pơgru mờ ală kơnòm dềt tàm mang chờ àng kơnhai ndar me tàm Anih tờm Dong kờl bơtàu tơnguh gơrờm bal kơnòm dềt koĕt kơl te càr Dăk Lăk là ală cau mè bèp. Gơwèt mờ ală cau do, broă gŏ kòn geh ñŏ nhơl, geh tơrgùm bal mờ ală bơyô mờ chờ hờp kơ̆p tus tŭ sa ƀañ, kàl Satềp Trung thu nam do neh geh tơl mờ kwơ màng ngan. Lŏ Lê Thị Hồng, mè oh Hoàng Lê Minh Khang ngoh rơngăc pà git: “là dùl nă cau mè gơlơh gơboh gơbài ngan mờ ngoh rơngăc ngan, añ gŏ kòn añ dê kung bè ală kòn dềt ndai chờ hờp ngan, gơboh ngan. Añ ưn ngài uă ngan”.

Mò Lưu Thị Bình Minh, Phó Lam bồ Anih tờm Dong kờl bơtàu tơnguh bơto bơtê tơrgùm bal kơnòm dềt koĕt kơl te càr Dăk Lăk pà git, tŭ do hìu bơsram do gam là hìu ơm bal bơh 144 nă kơnòm dềt, tàm hơ̆ geh 42 nă kơnòm dềt koĕt kơl tê tàm jơnau đơs, bal mờ ală kơnòm dềt lơyài tàm bơta ngăc ngar mờ tự kỷ. Ală broă lơh geh uă nùs nhơm gơboh gơbài bè do ờ mìng cèng tus ală kơnòm dềt in dùl ngai chờ hờp, mờ gam pờ geh ală mpồng boh bơr, dong kờl ală kơnòm dềt geh tai nùs nhơm pin dờn tơrgùm bal mờ mpồl bơtiàn. “Pah nhai Anih do kung bơyai lơh ală broă lơh hờ bơdìh ơdŭ bơsram nàng ală kơnòm dềt in, mơya Satềp Trung thu nam do krơi is rơlao là geh broă sền gròi bơh kwang đơng lam càr, Sờh tus pà phan, ală kơnòm dềt in mờ Anih do chờ hờp ngan. Do là dùl Satềp Trung thu geh tơl ngan, tài tàm mang ngai dơ̆ pram ală kơnòm dềt geh jà tus Anih tờm Niam chài nàng tus bal tai”.

Geh tai dùl Satềp Trung thu tus tàm hìu bơsram krơi is do. Tàm do, geh ală săp ntas sơngơr, geh ală tamya uă ngan bơta chờ hờp àng gơcrà bal mờ nùs nhơm kờñ gơboh bơh ală cau pơgru bal mờ kơnòm dềt dê, geh ală phan pà hờm ram geh kwơ màng ngan mờ geh uă ngan muh măt hàng niam bơnĕ. Mang chờ Satềp Trung thu hơ̆ geh tơn jơh, mơya săp ñŏ nhơl niam bơnĕ bal mờ nùs nhơm niam kung gam geh sùm tàm anih do, pơlam bal mờ ală oh pin dờn tàm rài kis gam tềng đăp.