Mơya, kung geh ală kal ke, gơkờl kờñ pal geh mhar bơsong. Tus jơh nhai 10, càr Dăk Lăk mìng rơ̆p rề priă ngui ù geh 1 rơbô 364 tơmàn đong, geh 45,8% kờp dŭ lài Mpồl duh broă Làng bol càr jào, tàm hơ̆ kấp càr mìng geh 1,2% khà broă rơndăp lơh.

Geh bơta do là broă tam gơl ờ hềt geh jơnau ring bal. Bŭ lah Adăt ù tiah nam 2023 geh ngui bơh ngai 01 nhai 07 nam 2024, mơya tus tŭ do geh ờ uă broă lơh gơrềng tus broă atbồ rề priă dia bè rề priă dia ơpah ù kung gam ờ hềt geh Jơnau lơh nền bơh Cíñ phủ dê cih nền nòn mờ Jơnau yal bơto pơlam. Ồng Phạm Ngọc Nghị, Củ tịc Anih duh broă Làng bol càr Dăk Lăk sồr ală anih lơh broă geh gơnoar tàm càr kơlôi sơnơng nền nòn sră nggal mờ cribơyai bal nàng bơsong bơta kal ke. Ală bơta gơwèt gơnăp gơnoar, càr rơ̆p lơh ngan bơsong. Di lah sơrlèt gơnăp gơnoar, ală mpồl lơh broă pal tă pơgồp jơnau đơs nàng càr pơyoa jơnau dan bơsong tus Dà lơgar.