Ala măt Ƀộ Cíñ trị, Tổng Ƀí thư ồng Tô Lâm neh jàu Jơnau lơh nền bơh Ƀộ Cíñ trị dê jàu ồng Trần Cẩm Tú, Kwang bàng Ƀộ Cíñ trị, Ƀí thư Đảng Dà lơgar, Kwang ătbồ Anih duh broă Sền swì Dà lơgar dê ăt gơnoar broă Duh broă sùm Ƀan Ƀí thư khoă XIII, mơkung đơs sùm, do là kơnòl broă kwơmàng tàm tŭ tơngai jơh gùt Đảng gam jơh nùs rơcăng pơrjum dờng ală kâp wèt tus Pơrjum dờng dơ̆ XIV bơh Đảng dê.

Ƀộ Cíñ trị dòn kơnờm jơh lơm tàm ồng Trần Cẩm Tú, dồ nă kwang bàng đơng lam bồ kâp dờng, neh geh bơto bơtê wil tơl, dờng pràn bơh kâp hơđơm, geh broă lơh ờs mờng jak chài mờ geh uă mờng chài broă lơh, neh lơh uă gơnoar broă đơng lam bồ kwơmàng bơh Đảng dê tàm Dà lơgar mờ ƀòn lơgar rơ̆p bơsong niam broă lơh pah ngai bơh Đảng dê; sồr Cơldŭ lơh broă Đảng Dà lơgar bal mờ ală anih lơh broă geh gơrềng lam lơh jăt niam broă lơh lơh broă; lơh geh bơta lơh broă bơnĕ bơnài, ring bal, ndrờm bal bơh ală anih lơh broă cíñ trị dê. Tềng đăp măt, ồng Trần Cẩm Tú tơrgùm sồr Cơldŭ lơh broă Đảng Dà lơgar mờ ală anih lơh broă gơrềng bal lơh gơs niam broă lơh rơcăng ai pơrjum dờng đảng ală kâp in, wèt tus Pơrjum dờng dơ̆ XIV bơh Đảng dê.