Gah bơto bơtê càr Dăk Nông nam bơsram do ờ tơl 1 rơbô 545 nă cau pơgru, ai gah lơh sơnơm càr dê tŭ do gam ờ tơl 664 nă cau lơh broă. Ală cau lơh broă gam ờ tơl do tơrgùm bơh uă nam mờ ngai sơlơ gơguh. Bulah càr neh rcang ngui Jơnau lơh nền Cíñ phủ dê sồ 111 nam 2022 nàng kĭ pơrgon lơh broă mờ 643 nă cau mơya ờ hềt lơh geh jơnau kờñ broă lơh bơto bơtê mờ lơh sơnơm, ngan là gơwèt mờ tiah sar lơgar ngài, tiah làng bol jơi bơtiàn dồ ết nă cau.

Ồng Lê Văn Chiến, Phó Củ tịc Duh broă sùm Anih duh broă làng bol càr Dăk Nông pà gĭt, geh uă bơta kal ke tàm broă jàu cau lơh broă ai gah bơto bơtê mờ lơh sơnơm in gơwèt mờ bàr pe càr tiah kơh bơnơm, khà kờp làng bơh gơguh kờp bal mhar ngan mờ làng bol ơm kis rah rài bè càr dê. Ală cau lơh broă geh jàu lơyah rlau mờ ală broă jàu tơrmù cau lơh broă pah nam dê, gơlam tus 2 gah kwơ màng do bơh jŏ neh ờ tơl den ngai sơlơ ờ tơl kơn jơ̆ ngan.