Anih dơ̆ 1 geh crăp tàm thôn Tu Thó, xã Tê Xăng mờ anih dơ̆ 2 crăp tàm thôn Đăk Dơn, xã Măng Ri. Kờp jơh priă crăp 2 anih pờ viễn thông mờr 1 tơmàn đong.

Lài do gùng pờ viễn thông tàm tiah do ờ pràn ngan broă ngui điện thoại nàng tàm yal tơngĭt bal bơh làng bol tam kơnuh sơnơm Ngọc Linh gơtìp uă ngan kal ke. Kung tài bơh gùng pờ ờ pràn den cau tam kơnuh sơnơm ờ gơtùi crăp camera nàng sền gàr suơn kơnuh sơnơm. Tơnơ̆ tŭ geh anih pờ viễn thông, neh geh 7 hìu bơnhă tàm xã Măng Ri, kơnhoàl Tu Mơ Rông crăp camera nàng sền gàr suơn kơnuh sơnơm Ngọc Linh bơh hìu bơnhă dê. Ală hìu bơnhă làng bol geh suơn kơnuh sơnơm Ngọc Linh rềp bal kung geh dờp geh bơta kwơ bơh broă jat sền mờ atbồ bal.