Bi Nay H’Tó ơm tàm xã Ia Rtô, ƀòn drà dờng Ayun Pa, càr Gia Lai bal mờ măt kă bro phan “Tơrnờm Jrai” neh lơh geh sră cơng tàng OCOP 3 nơm sơrmañ- phan bơna OCOP bơh sơnrờp xã dê. Bi khin cha lơh ală pang facebook, zalo, mờ fanpage “Tơrnờm Jrai Ayun Pa” nàng yal tơnggĭt uă phan bơna. Bi Nay H’Tó pà gĭt, broă livestream ală broă lơh gơlik phan dong năc blơi phan in gĭt wă loh bè phan bơna, bơh hơ̆ khà priă lơh geh bơh tăc phan ndrờm gơguh jăt ală nhai. Bi Nay H’Tó đơs: Tŭ lơh geh OCOP 3 nơm sơrmañ  bơh ƀòn drà dờng dê den gơ là ƀươn ngan, uă năc blơi phan lòt tus lùp. Tŭ lơh geh OCOP năc blơi phan khi lòt tus uă rlau bàr dơ̆, năc krơi gơ là uă ngan, geh năc bơh Hà Nội, ƀòn dờng Hồ Chí Minh. Añ kung lơh sră hơ mờ shipper, he dăp phan sir he hòi khi tus hơ̆ sồng lòt pơyua gời lơm.

Kung bè bi Nay H’Tó sơl, tơngai do, uă cau ùr bơh ƀòn dờng ƀòn drà tus ƀòn lơgar, tiah jơi bơtiàn dồ êt nă cau tàm ù tiah càr Gia Lai neh kong bòl glar kal ke lùp bơsram, gĭt wă geh ală bơta ƀươn bơta kwơ mờ măy mŏk sồ dê đơs bal mờ ală internet mpồl bơtiàn dê đơs is nàng ràng tơlik, yal tơnggĭt phan bơna tus mờ gal ngan cau ngui sa. Bi Hoàng Thị Hồng Hà ơm tàm thôn Qúy Đức, xã Ia Trok tus bal dơ̆ pờ drà điện tử tàm fanpage Mpồl Tam klăc Cau ùr kơnhoàl Ia Pa bal mờ phan bơna dà toh sràt mbar jù. Dơ̆ livestream gơhòi gơ jà rlau 3 rbô 300 nă cau sền, dờp geh tai rhiang sră dan blơi phan. Bi Hoàng Thị Hồng Hà, đơs: Ală tŭ tơmŭt dà toh sràt mbar jù tăc tàm drà den geh uă làng bol mờ năc blơi phan pin dờn mờ kờñ ngan. Mpồl cau geh kung tus còp sền, tìp măt lơh kwèng mờ pơlam ai añ in lơh kwèng mờ facebook, zalo kung bè tik tok nàng ràng tơlik măt kă bro phan he dê. Kơnờm mpồl cau ùr mờ phan bơna đah añ dê ngai sơlơ bơtàu tơngguh rlau tai, gơ tus mờ làng bol mờ năc blơi phan mhar rlau, ràng tơlik phan bơna niam rlau.

Tŭ do, Mpồl Tam klăc Cau ùr kơnhoàl Ia Pa neh lơh geh 5 broă lơh tơrlòng lài jăt ngui măy mŏk yal tơnggĭt jơnau cèng wơl uă cồng nha. Hơ̆ là broă lơh yal tơnggĭt “Pah nhai dồ krơh pơnrơ”, “Pah ngai 1 broă lơh geh kwơ”, “Pah poh dồ phan bơna gơ jăt bal mờ broă lơh Dơ̆ drà điện tử” tàm ală internet mpồl bơtiàn; broă lơh tơrlòng lài “Ătbồ Mpồl ờ sră pơ àr”, mìng dồ jơnau “Iăt kơno jơnau đơs cau tàm mpồl, cau ùr dê”. Ală broă lơh tơrlòng lài do neh pơgồp bơnah dong cau ùr tàm tiah do jăt thàn geh mờ tam gơl sồ, mơkung dong kờl ai uă phan bơna tus mờ cau ngui sa. Mò Huỳnh Thị Ngọc Lan, Củ tịc Mpồl Tam klăc Cau ùr kơnhoàl Ia Pa, càr Gia Lai, pà gĭt tai: Bol hi kờñ ngan mờ broă lơh tơrlòng lài “Pah poh dồ phan bơna jăt ngui mờ dơ̆ drà điện tử”. Lài mờ tŭ bol hi lơh broă lơh tơrlòng lài do den bơh ală broă lơh lài nàng pơlam ai ală cau tàm mpồl in livestream tơn tàm internet mpồl bơtiàn facebook, zalo…Bơh dơ̆ drà điện tử den uă oh mi cau ùr neh geh tŭ niam ràng tơlik phan bơna bơh he dê tàm internet mpồl bơtiàn dồ bă làm uă.

Tàm jơh gùt càr Gia Lai, mpồl cau ùr ală kâp neh lơh jăt 65 broă lơh tơrlòng lài “Mpồl cau ùr jăt ngui măy mŏk 4.0” mờ “Cau ùr tam gơl sồ” bal mờ gĭt nđờ rbô nă cau tàm mpồl, lơh mờ gàr sùm gĭt nđờ rbô mpồl zalo, facebook, tik tok, gah youtube…Jăt mò Rơ Chăm H’Hồng, Củ tịc Mpồl Tam klăc Cau ùr càr Gia Lai dê yal, broă ngui măy mŏk yal tơnggĭt jơnau neh dong oh mi cau ùr rơhời tam gơl pa gùng dà lơh sa kă bro, pơgồp bơnah tơngguh uă cồng nha broă lơh mpồl mờ bơtàu tơngguh lơh sa. Mò Rơ Chăm H’Hồng, đơs: Bol hi pơn jăt tai lơh jăt niam broă lơh mblàng yal tàm ală mpồl neh lơh bơh lài bơh Mpồl dê, website, mpồng yal tơnggĭt jơnau điện tử mpồl dê, pang zalo, facebook…jun yal mhar, di tŭ tus ală cau tàm mpồl ală gùng dà broă lơh bơh mpồl dê, ală Jơnau lơh nền tàm pơrjum Đảng dê, bơh ală Pơrjum Mpồl duh broă dê tus tơn cau ùr tàm mpồl dồ bă di tŭ.