Mpồl cau ùr ală xã, ƀòn drà dềt pơgồp bal kờp sền ală hìu bơnhă làng bol jơi bơtiàn dồ ết nă cau geh jơnau kờñ càn priă, dong kờl ù ơm, ù lơh hìu, ù lơh sa, tam gơl broă lơh mờ bơtàu tơnguh lơh sa jat ală bơta kwơ màng dong kờl priă jền jat jơnau sồr dê. Tus tŭ do, Mpồl tam klăc cau ùr kơnhoàl Di Linh  pơn jat tai dờp gơnoar bơh Ngân hàng Cíñ sách xã hội ai cau tàm mpồl cau ùr rƀah in càn priă nàng bơtàu tơnguh lơh sa mờ priă jơng kah dồs rlau 195 tơmàn đong. Bơdìh hơ̆, Mpồl càn priă tàm pơngơl mờ phan bơna mờ Ngân Broă lơh sa mờ bơtàu tơnguh Ƀòn lơgar kơnhoàl Di Linh rlau 10 tơmàn đong ai rlau 150 hìu bơnhă in càn.

Mò Ka Hương– Phó Củ tịc Mpồl Tam klăc cau ùr kơnhoàl Di Linh, càr Lâm Đồng pà gĭt: “Di Linh là tiah geh uă jơi bơtiàn dồ ết nă cau ơm kis, tàm hơ̆, hìu bơnhă rƀah kung gam geh uă ngan, tàm hơ̆ geh hìu bơnhă oh mi cau ùr jơi bơtiàn dồ ết nă cau. Mpồl tam klăc cau ùr kơnhoàl neh geh uă ngan broă lơh kờñ tơn jơh rƀah gơwèt mờ cau tàm mpồl làng bol jơi bơtiàn dồ ết cau rƀah in. Bè neh lơh broă mờ Ngân hàng Cíñ sác kơnhoàl lơh geh ală bơta ai cau tàm mpồl cau ùr rƀah in càn priă nàng bơtàu tơnguh lơh sa hìu bơnhă mờ Mpồl cau ùr kơnhoàl kung tơnggơs Kes priă tài cau ùr rƀah, bơh oh mi tă pơgồp tơn tơl nă cau 10 rơbô đông, mờ tŭ do kes priă neh geh tus 1 tơmàn đong. Bơh kes priă do, oh mi geh dong kờl priă bơtàu tơnguh lơh sa hìu bơnhă, tơn jơh jơgloh tơrmù rƀah".