Khà gơguh ai càn priă bơh Ngân hàng Cíñ sác xã hội kơnhoàl pah nam geh 12%. Gùt kơnhoàl geh 4 mpồl lơh broă mpồl ai càn (tàm hơ̆ geh Mpồl tam klăc cau ùr). Tus tŭ do, neh geh rơlao 11 rơbô nă cau, mờ priă jơnkah dồs di pơgăp 550 tơmàn đong.

Lài kơnhoàl geh khà làng bol jơi bơtiàn ờ gal cau rơlao 70%, kơnhoàl Krông Pa geh sền gròi ngan tus ală hìu làng bol jơi bơtiàn ờ gal cau tŭ geh càn priă sa priă cồng ờ uă bơh Ngân hàng Cíñ sác xã hội dê nàng bơtàu tơnguh lơh sa. Mò Ksor H’ Druin, Củ tịc Mpồl tam klăc cau ùr xã Chư Drăng, kơnhoàl krông Pa pà git, xã kung pa tơlik măt broă tơrlòng lơh “Ƀòn cau ùr lam lài” nàng ai geh bơta oh mi cau ùr tàm mpồl ing pơgơl bal broă mờng chài tàm broă lơh, ngui priă geh cồng nha. Mò Ksor Druin pà git: “Nàng ai oh mi cau ùr ngui priă càn bơh ngân hàng cíñ sác di pal, den bol añ kung neh bơyai lơh lòt mblàng yal, bơto sồr ai oh mi cau ùr in wă. Tơnơ̆ mờ tŭ càn priă den he pal bơcri priă tàm ală broă lơh sa nàng tơnguh rài kis. Pa do, añ kung neh dong kờl oh mi cau ùr càn priă, bơh priă càn do uă hìu kung neh git bơcri tàm broă tam phan, ròng phan. Den tàng tus tŭ do, den geh uă ngan hìu neh ngui geh cồng nha priă càn bơh ngân hàng cíñ sác nàng bơtàu tơnguh lơh sa hìu nhă”.