Muh măt glar hàp, gơjrañ sơ ềl ngan, pơlai soh ngan là nùs nhơm bơh mò Lê Thị Linh dê tàm sơnah ƀòn Tân Lợi, ƀòn dờng Buôn Ma Thuột, càr Dăk Lăk tàm ală ngai do. Mò pa gơtìp bol ờ niam pơrlồm kơñau priă 80 tơlak đong bơh tàm zalo. Mò yal, rlau dồ nhai lài neh tus dồ anih lơh broă dồ mpồng ƀòn dờng Buôn Ma Thuột lơh ală sră pơ àr tam gơl jơnau kờñ ngui ù. Drim ngai 02/10, sră nggal geh jun tus anih lơh broă dia, kờp bơnah priă dia pal tơm. Nàng ƀươn, mò yòng dồ nă kwang bàng lơh broă dia măt là T sền swì, dong kờl. Kwang bàng do dờn mờ rơ̆p hơ tàm dồ êt ngai. Bàr ngai tơnơ̆, bàr pe zalo krơi hòi tus yal is măt là T, là kwang bàng lơh broă dia sồr mò pơyua 80 tơlak đong tơm lài dồ bơnah. Iăt yal, mò neh pơyua jăt jơnau sồr bơh cau hòi dê mờ ờ gŏ sền swì wơl. Tus drim ngai 06/10, sồ zalo do pơn jăt tai hòi sồr pơyua tai 100 tơlak đong. Gŏ gơlơh pin tài bơh ngai rlô anih lơh broă Dia ờ lơh broă, mò hòi điện thoại tus kwang bàng sơnđan măt là T in den kwang bàng do đơs nền ờ gŏ geh broă hòi zalo sồr pơyua priă tơm priă dia ờ. Mò gơtìp pơrlồm, mò lòt tus kwang àng yal. Mò Linh yal: Ờ gŏ gĭt bè lơi mờ gơ̆p gĭt añ tơm dia ù mờ gĭt kwang bàng lơh broă dia măt bè hơ̆ nàng pơrlồm muh măt hòi điện thoại, tơnơ̆ hơ̆ gơ̆p cih jơnau pơyua sồ măt kes priă gơ̆p dê sồr añ pơyua priă. Gŏ sồ măt kes priă sơnđan măt T den tàng añ neh ờ gŏ pin chi lơi halà kơlôi sơnơng nền sền swì wơl mờ pơyua tơn. Bơklau añ pơlai soh phan bơna kung neh lòt tus anih priă jền sền swì den măt T ndrờm bal mờ măt kwang bàng lơh broă dia sơl mơya ờ ndrờm bal jơi, mờ cau lơh broă anih priă jền đơs khà priă 80 tơlak đong neh pơyua geh jun tus măt kes priă tus tàm lơgar Campuchia ne.

Bơh bồ nam 2024 tus tŭ do, Kwang àng càr Dăk Lăk neh yă 25 dơ̆ lơh tìs ngui măy mŏk pa pơrlồm sa kơñau jơtài gơ wèt mờ 75 nă cau gơtìp yă. Kờp jơh priă sa kơñau gơguh tus gĭt nđờ jơ̆t tơmàn đong. Trung tá ồng Nguyễn Huy Nam, Kwang ătbồ Cơldŭ Lơngăp lơngai internet mờ rơcăng lài kơryan cau lơh tìs ngui măy mŏk pa gơ wèt Kwang àng càr Dăk Lăk dê pà gĭt, bơrnăc bơh ală cau do dê là lơh pơrlồm măt kwang bàng ală anih lơh broă lơh jăt adăt boh lam dê, bè: Kwang àng, anih cah rñah, anih sền swì jăt sền, cau lơh broă anih priă jền dê hòi điện thoại, zalo, facebook sồr pơyua priă tơm priă lơh glài lơh tìs lòt rê, tơm priă lơh sră kan kươk làng bol, priă piam kòp tàm hìu sơnơm, sền gàr rềs àr halà ală bơta dia priă pal tă tơm ndai; hòi jà bơcri priă drà kă bro phan điện tử, priă ờ ngan. Bal mờ hơ̆, ală cau do kung sùm ngui ală broă lơh kơñau măt facebook, zalo, cih jơnau pơyua cau pròc mhàm pơrlồm càn priă; lơh ală pang web tăc phan tơn tàm internet lơh bal pơrlồm; lơh bơyô bơh jơnau cih pơyua tàm kờñ tơnơ̆ hơ̆ sồr pơyua priă lơh sră nggal ơm kis kơnhăp tàm lơgar ndai; ai càn priă sa priă cồng uă bơh app internet; pà phan sồr pơyua priă tơm lài priă tă jun pơndiang bơh lơgar ndai rê…Trung tá ồng Nguyễn Huy Nam, bơto sồr: Dan làng bol pal kơrhia ngan, rơcăng ngăc, sền gàr ndơ̆p ală jơnau yal tơnggĭt bè rài kis is să tờm dê. Tŭ lơh bal tàm internet mpồl bơtiàn bañ yal tơnggĭt jơnau. Tŭ lơh nền broă lơh gơrềng tus pơyua priă pal sền swì nền nòn. Sùm jăt sền broă lơh mờ gùng dà bơrnăc bơh ală cau lơh tìs ngui măy mŏk pa dê tàm ală sră ƀăo anih yal tơnggĭt mblàng yal jơnau ngan ngồn dê.

Ồng Trần Thế Việt, Phó Kwang ătbồ Viettel Dăk Lăk đơs là, tam gơl sồ gam geh lơh pràn kơldang wèt tus jơnau kờñ chồl tơngguh cồng nha lơh geh, cồng nha lơh broă bơh jơh gùt mpồl bơtiàn dê; tơl broă lơh tàm ală broă gam geh lơh mờ sồ jơh, jơnau yal tơnggĭt geh tơrgùm bal jơh, lơh gơs ală anih jơnau yal tơnggĭt sồ dờng. Mơya gơ jăt bal mờ hơ̆ là cau lơh tìs geh bồ tơnggoh jak ngui internet điện thoại, ală phan ngui internet mpồl bơtiàn lơh broă lơh pơrlồm geh gŏ ngai sơlơ uă. Ală cau sùm ngui ală bơta chài pơrlồm ai kơñau tìs mờ adăt boh lam ală măt facebook, zalo, viber, jơnau yal tơnggĭt is să tờm dê sơnđan măt, lơh sim ờ ngan…lơh broă lơh pơrlồm sa kơñau priă. Nàng tơrmù ƀà ală broă lơh do tàm internet điện thoại, pal sang jơh sim ờ ngan mờ lơh ală anih măy mŏk lơh is kơryan ală sồ điện thoại “ờ ngan” hòi tus, cih jơnau pơyua uă dơ̆ pơrlồm cau năc blơi phan. Ồng Trần Thế Việt, pà gĭt: Viettel rơ̆p rơcăng lài kờp sền nền wơl dồ bă nền nòn gĭt geh sim lơi ờ di cau tờm pơyua tus anih lơh broă thôn, ƀòn, geh ală cau lơh broă bơh Viettel dê gam bal mờ ală cau tàm mpồl tam klăc sồ mpồl bơtiàn tàm ală tŭ lơh VneID mờ lơh loh làng sim. Ală anih măy mŏk lơh is bơh Viettel dê kung rơ̆p jăt sền tus ală sim sùm hòi tus ală sồ điện thoại ndai, ală anih măy mŏk lơh is do rơ̆p pơyua is pà gĭt ngan ngồn, dilah năc pà gĭt sim ờ ngan lơh lơngañ den rơ̆p kơryan is tơnơ̆ hơ̆ tơn.

Tềng đăp gơlik geh kal ke bơh cau lơh tìs măy mŏk pa dê tàm anih internet, bơdìh mờ broă lơh pràn ală broă lơh rơcăng lài, kơryan bơh anih lơh broă geh gơnoar dê, làng bol pal yờ tơngguh nùs nhơm rơcăng ngăc, kơrhia ngan, lơh jăt jơnau bơto pơlam bơh kwang àng dê, ờ gŏ di yal jơnau yal tơnggĭt să tờm dê nàng kờñ pleh gơtìp cau gĭt, cau gŏ jơnau yal tơnggĭt. Bơh hơ̆ dong tơl nă cau tơrmù ƀà mờ rơcăng lài pleh gơtìp cau ờ niam ai kơñau jơnau yal tơnggĭt, sơmờm nàng pơrlồm sa kơñau priă, ờ gơtìp gơ ơm tàm bơta “priă roh să kong”.