Bơh nam 2019 tus tŭ do, càr Dăk Lăk neh bơyai lơh kĭ hơ lơh bal, lơh broă bal lòt nhơl mờ uă càr, ƀòn dờng tàm jơh gùt lơgar, tơrgùm tàm 4 broă: hòi jà, yal tơnggĭt lòt nhơl; cribơyai yal tơnggĭt jơnau bè broă lơh bơtàu tơngguh lòt nhơl, rơndăp ù tiah mờ hòi jà bơcri priă; lơh uă phan bơna lòt nhơl; tề lam, bơto mpồl cau lơh broă gah lòt nhơl. Pơgồp bal mờ ală tiah lơh ală chờ drà lòt nhơl ală lơgar pah nam; cribơyai yal tơnggĭt jơnau, lơh bal pang yal tơnggĭt jơnau điện tử lòt nhơl, ală phan ngui internet mpồl bơtiàn; ờs mờng pah dơ̆ cribơyai bè broă lơh jăt ală tơnggume lơh broă neh kĭ; pơgồp bal, bơcri priă lơh mờ ai ngui ală dơ̆  gùng lòt nhơl…

Kơnờm bè hơ̆, tàm 05 nam do, càr neh wă rlau 5 tơlak 600 rbô nă năc, priă geh bơh kă bro geh mờr 4 rbô 300 tơmàn đong. Tàm pơrjum do, cau ala măt neh cribơyai, yal bơta bơta geh ngan lam lơh jăt lơh bal mpồl, lơh broă bal đah 2 càr, 3 càr, pà gĭt ală bơta ờ hềt pràn jak, gơkòl, bơh hơ̆ dan geh ală broă lơh bơsong nàng yờ tơngguh uă cồng nha lơh bal, lơh broă bal.