Mờ tơngu me “Kơkào Dà Làc – Bơta àng gơcrà niam”, Festival bơkào Dà Làc dơ̆ 10 nam 2024 rơ̆p bơyai lơh bơh ngai 04 nhai 12 tus ngai 31 nhai 12 nam 2024, mờ 10 broă lơh tờm bal mờ 12 broă lơh dờp bal.

Tàm hơ̆, bơdìh mờ 2 broă lơh sơn đờm mŭt lơh mờ tơn jơh pơgồp bal mang đơs crih tamya chờ gờm nam pa 2025, Festival bơkào Dà Làc dơ̆ 10 pơn jăt tai ai geh bơta niam bơh bơkào dê geh ràng tơlik tàm uă tiah gùt dar tơnao dà Xuân Hương mờ tàm ală gơl gùng tàm dơlam ƀòn dờng Dà Làc, geh tiah ràng tăc ơlăk vang-ce-kơphe mờ phan geh lơh krơi is ƀòn dờng Dà Làc dê, drà tăc biăp-bơkào, broă tìp bal niam chài đơs crih tamya ală lơgar Dà Làc – Hàn Quốk, Carnaval lòt tàm gùng bơkào bal mờ phan kwơ lời wơl… Festival bơkào Dà Làc dơ̆ do pơn jăt tai ai tơngŏ ƀòn dờng Dà Làc là ƀòn dờng Festival bơkào lơgar Việt Nam dê, ƀòn dờng bơceh lơh tàm gah gùng đơs crih bơh UNESCO dê mờ là ƀòn dờng gơwèt “Mpồl 05 ƀòn dờng Festival niam câu Á dê”.