Rơndăp broă lơh bơtơ̆t sơndră mờ dà tih, tơrlah ù ală ƀòn làng bol jơi bơtiàn ờ gal cau kis tàm xã Đăk Bla ƀòn dờng Kon Tum jòng rơlao 4,4 kơi sồ. Rơndăp broă lơh do bơh ngai 9 nam lài mờ kờp dŭ nhai 9 nam do geh lơh gơs, mơya tus tŭ do mìng rơ̆p lơh geh 18% broă rơndăp lơh.

Kờp jơh priă bơcri rơlao 200 tơmàn đong, mơya tus tŭ do khà broă lơh tàm rơndăp broă mìng rơ̆p lơh geh rơlao 60 tơmàn đong. Do là rơndăp broă tờm càr dê, den tàng nam 2023 neh geh ai tơl priă bơh kes priă dà lơgar; tơnơ̆ mờ hơ̆ geh ai lơh tơnjŏ tơngai mờ priă bơcri tus ngai 31 nhai 12 nam 2024. Mơya rơndăp brtoă lơh bơtơ̆t do di gơlan gơtìp kal ke nàng lơh gơs jăt mờ tơngai neh geh ai tài ală bơta kal ke bè ù tiah. Bal mơ rơndăp broă lơh bơtơ̆t sơndră dà tih, dà cò, tơrlah ù ală ƀòn làng bol jơi bơtiàn ờ gal cau kis jăt gah dà dờng Đăk Bla, ală broă lơh tờm tàm càr Kon Tum kung di gơlan lơh gơs lơyài mờ tơngai geh ai, ờ gơtùi bơcri priă di mờ broă rơndăp lơh geh ai.