Bơh lòt sền, sền swì, anih lơh broă geh gơnoar bơh càr Lâm Đồng dê gĭt nền geh 109 nơm rbàng ờ kơnhăp kờñ pal mhar geh lơh niam wơl, lơh kơnhăp wơl, lơh wơl halà ala. Uă ngan ală rbàng do ndrờm gơ ơm tàm tiah sar lơgar ngài, tiah làng bol jơi bơtiàn dồ êt nă cau gơ wèt ală kơnhoàl: Đức Trọng, Di Linh, Bảo Lâm, Dam Rong…

Jăt ồng Hoàng Anh Tuấn, Phó Kwang ătbồ Sở Gùng lòt rê jun pơndiang phan càr Lâm Đồng dê yal, nàng kờñ niam lơngăp lơngai, lơh geh jơnau kờñ jun pơndiang phan bơna, lòt rê, drơng lơh sa mờ rài kis làng bol dê, ngan là tàm nhai mìu càl rbŭt dờng, càr gam geh broă rơndăp lơh bơnah priă nàng lơh niam wơl, lơh kơnhăp wơl ală rbàng ờ kơnhăp do. Nàng lơh niam wơl, sơlơ lơh wơl halà ala gơ wèt mờ ală rbàng neh ờ kơnhăp ngan, priă jền kờñ pơgăp 965 tơmàn đong ai 109 nơm rbàng kờñ lơh niam wơl do in.