5 nam lài, bi Phan Hữu Trung, ơm tàm thôn ĐhaMi, xã Ba, kơnhoàl tiah kơh bơnơm Đông Giang, càr Quảng Nam gơwèt hìu bơnhă kal ke, ờ geh broă lơh sùm. Tơnơ̆ tŭ geh broă lơh lòt lơh broă hờ lơgar ndai, bi Phan Hữu Trung geh gơnoar atbồ tiah do dong kờl lơh sră nggal càn 200 tơlak đong bơh Ngân hàng Cíñ sác Xã hội dê nàng lòt lơh broă hờ lơgar ndai.

Tơnơ̆ 3 nam lơh broă tàm lơgar Nhờk, bi tềm pềr geh khà priă uă đau. Bơdìh mờ khà priă tềm pềr, bơta chài lơh broă bơh bi Phan Hữu Trung dê geh tơnguh uă. Geh priă bơcri, bi Phan Hữu Trung rê wơl tàm ƀòn tờm bơcri priă kă bro jun pơndiang phan mờ lơh geh priă jền uă. Bi Phan Hữu Trung pà gĭt:“Lài do hìu bơnhă añ kal ke ngan kơnờm gơnoar atbồ tiah do pơndờm pơnđiang mờ sền gròi bơto pơlam lòt lơh broă hờ lơgar ndai tàm drà lơgar Nhờk. Pah nhai añ lơh geh 32 tơlak đong dùl nhai. Tŭ do rài kis ờ gam kal ke bè lài do tai. Tŭ do tàm tiah do geh uă gơ̆p bơyô lòt lơh broă hờ lơgar ndai uă”.

Lơh jat Rơndăp broă lơh dềt sồ 3 “Bơtàu tơnguh bơto bơtê broă lơh mờ bơsong broă lơh ai cau lơh broă tiah làng bol jơi bơtiàn dồ ết nă cau mờ tiah kơh bơnơm in”, kơnhoàl Đông Giang geh dong kờl rlau 3 tơmàn đong. Kơnhoàl neh sền gròi jun cau lơh broă hờ lơgar ndai tàm lơgar ndai. Jat hơ̆, cau lơh broă geh dong kờl priă jền bơto bơtê, bơsram dà lơgar ndai, bơsram broă, kham pràn kơl dang să jan mờ ală sră nggal lik mờ mut tàm lơgar, geh dong kờl priă càn bơh Ngân hàng Cíñ sác Xã hội. Tus bal drà lơh broă lơgar ndai, cau lơh broă là làng bol jơi bơtiàn dồ ết nă cau ờ mìng geh priă jền  sùm, lik klàs rƀah mhar lơm mờ gam lùp bơsram geh ală bơta jak chài, bơta gĭt wă nàng rê wơl tàm ƀòn lơgar lơh broă.

Bơh nam 2022 tus tŭ do, kơnhoàl Đông Giang neh ai rlau 150 nă cau lơh broă tàm lơgar ndai. Ồng Đỗ Hữu Tùng, Phó Củ tịc Anih duh broă làng bol tiah kơh bơnơm Đông Giang, càr Quảng Nam pà gĭt, jơh gùt kơnhoàl Đông Giang geh 15 rơbô nă cau tàm sơnam lơh broă mơya khà cau lơh broă hờ lơgar ndai ờ hềt uă:“Rơndăp broă lơh bè bơtàu tơnguh bơto bơtê broă lơh mờ bơsong broă lơh ai cau lơh broă tiah làng bol jơi bơtiàn dồ ết nă cau mờ tiah kơh bơnơm in” gơwèt broă lơh jơnau kờñ Dà lơgar bơtàu tơnguh lơh sa- mpồl bơtiàn tiah làng bol jơi bơtiàn dồ ết nă cau mờ tiah kơh bơnơm, añ đơs là do là rơndăp broă lơh ngan ngồn mờ geh kwơ. Làng bol neh gĭt wă niam ngan bè lòt lơh broă hờ lơgar ndai geh priă jền mờ kơ̆ kơl jăp rài kis. Do là bơta brờn brài ngan. Mờr tus, kơnhoàl Đông Giang lơh pràn bơto pơlam, bơyai lơh drơng broă lơh nàng ală drà tàm lơgar mờ lơgar ndai in gĭt bè lơh broă hờ lơgar ndai”.

Tơngai pa do, ală kơnhoàl tiah kơh bơnơm càr Quảng Nam neh mblàng yal mờ pờ uă ơdŭ bơto broă lơh mờ dong kờl cau lơh broă lòt lơh broă tàm lơgar ndai. Bơh nam 2022 tus tŭ do, càr Quảng Nam jun rlau 4 rơbô nă cau lơh broă lòt lơh broă tàm lơgar ndai, uă ngan là drà lơgar Hàn Quốc, Nhờk, Lào, Đài Loan. Nàng dong kờl cau lơh broă lòt lơh broă geh tŭ tơngai pơr gon tàm lơgar ndai, ală gah lơh broă geh gơnoar càr Quảng Nam neh pờ uă dơ̆ lơh broă drơng broă lơh, kờp sền jơnau kờñ bơh cau lơh broă dê nàng bơto pơlam, pơlam gùng dà ai cau lơh broă in. 

Càr Quảng Nam sền gĭt lòt lơh broă hờ lơgar ndai là dùl tàm ală broă lơh geh ngan tàm broă lơh geh broă lơh, tơnguh uă priă lơh geh. Den tàng bè hơ̆, pah nam, ală sở, gah broă, ală tiah sơlơ tơnguh tai broă lơh mblàng yal, yal tơngĭt uă gùng dà broă lơh bơh Dà lơgar dê bè lòt lơh broă hờ lơgar ndai. Càr do kung lơh broă rơndăp lơh kờp sền, tơrgùm kờp mat cau tàm sơnam lơh broă, jòi gĭt bơta kơ̆p kờñ, jơnau kờñ lòt lơh broă hờ lơgar ndai. Jat tàm ală bơta hơ̆, rcang pơgồp bal mờ ală mpồl lơh sa kă bro lòt lơh broă hờ lơgar ndai, bơyai lơh jun cau lơh broă lòt lơh broă hờ lơgar ndai di pal mờ bơta pràn jak bơh cau lơh broă dê. Ồng Nguyễn Qui Quý, Phó Kwang atbồ Sở Lơh broă, Cau ling sồt să mờ Mpồl bơtiàn càr Quảng Nam pà gĭt: “Bè broă jun cau lơh broă lòt lơh broă tàm lơgar ndai, tơngai pa do geh kwang đơng lam bồ càr Quảng Nam sền gròi uă ngan. Do là kơnòl broă kwơ màng tàm broă lơh tơrmù rƀah kơ̆ kơl jăp kung bè brồ guh lơh pas ai ală hìu bơnhă làng bol in, is ồn tàm ală kơnhoàl tiah kơh bơnơm. Broă jun cau lơh broă lòt lơh broă hờ lơgar ndai jat sră pơrgon geh uă tam gơl niam ngan mờ geh bơta lơh gơ rề uă, khà cau lơh broă lòt lơh broă hờ lơgar ndai ngai sơlơ gơguh, rài kis bơh khi mờ hìu bơnhă dê geh tam gơl uă ngan, mơkung tam gơl geh broă lơh mờ rề ơnàng lơh broă”.

 Gơtùi đơs là, bơh broă lơh jun cau lơh broă lòt lơh broă hờ lơgar ndai jat sră pơrgon neh lơh geh ală bơta ai cau lơh broă càr Quảng Nam in tơnguh uă priă lơh geh, kơ̆ kơl jăp rài kis, pơgồp bơnah tơnguh uă bơta jak chài ai mpồl cau lơh broă in, tơrmù rƀah mhar mờ kơ̆ kơl jăp.