Jơnau yal tơrgùm jơnau đơs, cri bơyai tàm Pơrjum dờng pà git, ală jơnau đơs tơlik nùs nhơm chờ, chờ hờp tềng đăp mờ ală cồng nha dờng màng bơh broă tam gơl pa dà lơgar dê, tàm hơ̆ geh broă pơgồp bal dờng màng bơh mpồl tam klăc dờng gùt jơi bơtiàn.

Sồr pơn jăt tai mblàng lơh loh gơnoar broă, broă lơh bơh Mặt trận dê tàm bơta tŭ do, pơgồp bal tàm broă ai dà lơgar mŭt tàm rài pa mờ ai geh ờ uă broă lơh pràn nàng tơnguh uă bơta niam, cồng nha broă Mặt trận tàm tơngai tus. Pơrjum dờng neh ring bal pồ 397 nă kwang bàng tus bal Anih duh broă Mặt trận Dà lơgar Việt Nam khoă X. Ồng Đỗ Văn Chiến, Kwang geh jơng tàm Ƀộ Cíñ trị, Ƀí thư Đảng Dà lơgar, Củ tịc Anih duh broă Mặt trận Dà lơgar Việt Nam khoă IX neh geh pồ tai guh at gơnoar broă Củ tịc Anih duh broă Mặt trận Dà lơgar Việt Nam khoă X.