Tàm dơ̆ wă, Phó Thủ tướng đơs nền, Việt Nam sền lơgar Mỹ là lơgar lơh broă bal geh bơta kwơ màng uă ngan mờ kơ̆p kờñ bal mờ lơgar Mỹ pơn jat tai ai tơngume bơta gĭt gơ̆p pa mut lơh jrô ơnàng làm uă, geh cồng nha, mut lơh broă ngan ngồn jat tàm ală bơta sền dờng màng lơngăp lơngai is, gơnoar tờm, tơl làm kơnhoàl ù tiah, kơrnoat boh lam, cíñ trị bal mờ gơ̆p, cèng wơl bơta kwơ geh ngan ai làng bol 2 lơgar in mờ tă pơgồp ai ring lơngai, kơ̆ kơl jăp, lơh broă bal, bơtàu tơnguh tàm tiah do mờ tàm dunia.

Phó Thủ tướng kơ̆p kờñ lơgar Mỹ pơn jat tai sền gròi mờ tơnguh tai priă jền dong kờl Việt Nam, tam gơl năng lượng, tam gơl tơlir, rcang lài pleh mờ tam gơl nhơm trồ tiah, sền gàr phan poan jơng tàm brê. 2 gah cribơyai bè ală broă ală lơgar mờ tàm tiah do dê sền gròi, mơkung ring bal broă ală anih lơh broă geh gơrềng bơh 2 lơgar dê pơgồp bal niam nàng rcang ai ală broă lơh tơngkah kir sơnrai 30 nam lơh bơta gĭt gơ̆p cribơyai broă mờ lơgar ndai đah lơgar Việt Nam mờ Mỹ tàm nam 2025.