Ƀlàng sre Đất Đỏ, tàm xã Cuôr Knia, kơnhoàl Buôn Đôn ơnàng rlau 250 lồ, ngài mờ ală tiah làng bol ơm kis tus rlau 8 kơi sồ. Do là tiah tam kơphê, tiêu, kòi sre bơh rlau 40 hìu bơnhă làng bol tàm xã dê. Nàng mut tàm tiah lơh broă sa, làng bol mìng geh 2 bơta rơ wah là lòt rơwềng gan gùng xã Ea Bar halà rbàng dà croh Nước Trong. Gùng lòt rơwềng gan xã Ea Bar ngài rlau 2 dơ̆, ai lòt gan rbàng den ờ tơl bơta lơngăp lơngai.

Do là rbàng bê tông geh làng bol tă pơgồp is priă jền lơh bơh nam 2005. Rbàng ơnàng 2 thơk, ờ geh phan pơngàr 2 gah rbàng, neh geh uă tềl rơđàng, bơcah; ală jrong rbàng den neh gơbàn nchùn. Nàng lòt rê ing, làng bol ngui dơm chi dờng mờ jòng nàng kờl rbàng. Ồng Nông Ngọc Quyết, dùl hìu bơnhă làng bol ơm tàm thôn Ea Kning, xã Ea Bar, kơnhoàl Buôn Đôn geh 1 lồ 5 sào ù tam phan tàm tiah do, yal: “Tàm do ù lơh sa là uă ngan, mơya gùng lòt rê kal ke ngan, ngan là lòt gan rbàng. Rbàng do jun pơdiang phan ờ lơngăp lơngai”.

Buôn Đôn là dùl tàm 2 kơnhoàl tiah nhàr lơgar bơh càr Dăk Lăk dê. Rài kis làng bol uă ngan kơnờm tàm broă lơh broă sa. Uă tiah lơh sa gùng dà lòt rê kal ke ngan. Jat ồng Bùi Văn Vinh- Kwang atbồ Cơldŭ lơh broă Lơh sa phan bơna bơt bơtàu kơnhoàl Buôn Đôn yal, bơh kờp sền jơh gùt kơnhoàl geh 12 nơm rbàng ngui tàm rài kis làng bol dê kờñ geh lơh nàng drơng jơnau kờñ lòt rê bơh làng bol dê. 4 nam lài, bơh priă dong kờl bơh Kụk gùng ù gờl Việt Nam, kơnhoàl neh lơh geh 2 nơm rbàng yồng kơnhăp tàm ală xã Ea Huar mờ Ea Wer, kờp jơh priă tă lơh 24 tơmàn đong. 10 nơm rbàng gam wơl kờñ geh pơgăp 35 tơmàn đong lơh den ờ hềt geh ai priă jền nàng lơh. Ồng Bùi Văn Vinh, pà gĭt:“Kơnhoàl neh dan mờ Dà lơgar, càr dong kờl tơl nơm rbàng pơgăp bơh 300 tus 400 tơlak đong nàng lơh rbàng kơnhăp, ngui tàm rài kis làng bol dê lòt lơh broă sa, jun pơndiang phan lơh geh bơh broă lơh sa ƀuơn ngan, kơnòm bơsram lòt bơsram lơngăp lơngai tàm kàl mìu dờng dà kŏ dà cò”.

Mờ ngan ngồn là càr tiah kơh bơnơm, ù tiah dờng ơnàng mờ uă dà dờng, dà croh, càr Dăk Lăk kờñ ngan lơh tai uă rbàng ngui tàm rài kis làng bol dê. Tàm tơngai bơh nam 2016 – 2022, bơh priă dong kờl bơh Kụk gùng ù gờl Việt Nam mờ Anih duh broă Jơi bơtiàn dê, càr neh lơh geh 97 nơm rbàng drơng broă làng bol, kờp priă 200 tơmàn đong, tàm ală xã tiah I, II mờ III gơwèt ală kơnhoàl tiah sar lơgar ngài. Ồng Lê Công Du– Phó Kwang atbồ Sở Gùng lòt jun pơndiang phan càr Dăk Lăk pà gĭt, jơh gùt càr tŭ do gam 210 nơm rơbàng ngui tàm rài kis làng bol dê neh gơtìp ờ kơnhăp, kờñ lơh pa ala, kờp jơh priă tă lơh pơgăp 400 tơmàn đong. Ồng Lê Công Du, đơs: “Jơnau kờñ priă tă lơh dờng, tàm tŭ priă jền bơcri lơh bơh càr dê ờ hoan geh, bol añ neh dan priă jền dong kờl bơh Dà lơgar bơcri priă ai càr Dăk Lăk in gờñ bơcri priă lơh ală rbàng ờ gam kơnhăp gam wơl. Bơh hơ̆ dong kờl jơnau kờñ lòt rê, jun pơndiang phan bơna ai làng bol in”.

Lòt rê tàm ală rbàng yau ờ gam kơnhăp tai, rbàng ing digơlan gơtìp uă bơta rềs àr, mơya tài bơh drơng rài kis pah ngai dê làng bol tàm tiah sar lơgar ngài càr Dăk lăk kung gam pal lòt rê pah ngai sơl.