Jat hơ̆, Phó Thủ tướng Cíñ phủ ồng Trần Hồng Hà jàu Ƀộ Gùng lòt- Jun pơndiang phan đơng lam, pơgồp bal mờ Ƀộ Broă rơndăp lơh mờ Bơcri priă mờ ală anih lơh broă geh gơrềng sền sơ wì jơnau dan bơh Anih duh broă làng bol càr Khánh Hòa mờ Anih duh broă làng bol càr Lâm Đồng dê, yal mờ Thủ tướng Cíñ phủ in lài mờ ngai 30/10/2024. Kwang đơng lam bồ 2 càr ring bal jơnau đơs bơh cau lam bồ Cíñ phủ dê jàu Anih duh broă làng bol càr Khánh Hòa lơh anih lơh  broă geh gơnăp gơnoar Rơndăp broă lơh PPP bơcri priă lơh gơl gùng rơndeh lòt mhàr Nha Trang- Dà Làc.

Kờp jơh bơta jòng gơl gùng gơwèt Rơndăp broă lơh dê rlau 80 kơi sồ, tàm hơ̆ gơl lòt gan ù tiah càr Khánh Hòa pơgap 44 kơi sồ, gơl lòt gan càr Lâm Đồng pơgap 36,8 kơi sồ. Rơndăp broă lơh bơh sơn rờp kờp jơh priă bơcri lơh pơgap 25 rơbô tơmàn đong. Tơngai lơh jat rơndăp broă lơh là bơh nam 2024 tus nam 2028. Rơndăp broă lơh gùng rơndeh lòt mhar tàm tơrbŏ 2 anih tờm lòt nhơl dờng Nha Trang mờ Dà Làc geh lơh rơ̆p sơlơ tơnguh tai lơh bal kơnhoàl ù tiah, bơtàu tơnguh lơh sa, pơgồp bal mờ gàr niam lơngăp lơngai, sền gàr Dà lơgar.