Kờp dŭ kờp jơh tơngai lơh broă bơh pơrjum dê là 29 ngai nggùl. Tàm pơrjum do, Quôk hội rơ̆p sền sơ wì, ring bal 15 adat, pal sền gròi ngan là Adat rcang lài kơryan ồs sa, crùh ồs sa mờ dong kờl cau gơtìp rềs àr; Adat tam gơl, bơtơl bàr pe bơta bơh Adat Sră kham sơm kòp ờ sa priă; Adat rcang lài kơryan tăc blơi cau (tam gơl); Adat Mpồl ala mat cau lơh broă (tam gơl)... Quôk hội kung rơ̆p sền sơ wì, tă pơgồp jơnau đơs tàm 13 rơndăp broă lơh Adat, pal sền gròi ngan là rơndăp broă lơh Adat Ồs đèng (tam gơl); rơndap broă lơh Adat Cau pơgru; rơndăp broă lơh Adat dia priă lơh geh bơh mpồl lơh sa kă bro dê (tam gơl); rơndăp broă lơh tam gơl, bơtơl bàr pe bơta bơh Adat yal tơngĭt.

Tàm pơrjum dơ̆ 08, Quôk hội kung sền wơl cồng nha lơh jat broă rơndăp lơh bơtàu tơnguh lơh sa- mpồl bơtiàn, kes priă Dà lơgar nam 2024 mờ sền sơ wì, lơh nền broă rơndăp lơh bơtàu tơnguh lơh sa - mpồl bơtiàn, kờp dŭ lài kes priă dà lơgar, broă lơh tam pà kes priă dà lơgar nam 2025; sền sơ wì ală jơnau yal bè broă lơh sền gàr adat boh lam, rcang lài kơryan sa kuề sa kuà, cau lơh tìs mờ lơh tìs adat boh lam, bơsong jơnau dan bơh cau tĕ khà dê.