Tàm dơ̆ tìp măt kâp dờng, Thủ tướng Cíñ phủ ồng Phạm Minh Chính jờng rơ dơ̆ lòt còp bơh Củ tịc Hạ viện lơgar Malaysia dê. Bàr nă kwang đơng lam bồ dồ nùs bal bè ală gùng dà lơh broă bal kwơmàng tàm tơngai tus nàng kờñ ai gĭt gơ̆p 2 lơgar gơguh tus broă dờng pa. Thủ tướng Cíñ phủ sồr 2 lơgar pơn jăt tai lơh kơ̆ kơl jăp bơta pin dờn cíñ trị bơh sơlơ tàm pơgơl mpồl kwang bàng kâp dờng, ală kâp mờ tàm jơh ală gah lòt còp bal mờ gơ̆p; pơnđơl ai priă lơh geh bơh kă bro phan đah 2 lơgar lơh geh 18 tơmàn dolar Mỹ jăt gùng dà pơnring bal; lơh geh bơta ƀươn tăc blơi ală bơta phan mờ lơgar ndai bơh 2 gah dê geh uă bơta ƀươn mờ bơta pràn; sồr lơgar Malaysia dong kờl Việt Nam bơtàu tơngguh gah lơh sa mờ măy mŏk Halal mờ gờñ kĭ sră nggal lơh broă bal tàm broă do.

Bàr gah kung dồ nùs bal pơgồp bal niam mờ gơ̆p mờ ală lơgar Asean ndai bơ̆t bơtàu dồ Asean tam klăc, ring bal, sơlơ tơngguh tai lơh broă bal dơlam mpồl, lơh jăt niam gơnoar broă tờm tàm bơsong ală broă kơnhoàl ù tiah do; dồ nùs bal gàr sùm nùs nhơm bal bơh Asean dê tàm broă Dà lềng đah măt tơngai lik.