Tàm dơ̆ tìp, Thủ tướng Cíñ phủ ồng Phạm Minh Chính đơs sùm lơgar Việt Nam sùm sền broă bơtàu tơnguh bơta git gơ̆p mờ lơgar Lo là gùng dà broă lơh lài kung bè tơnơ̆, di pal ngan, rơwah broă lơh jŏ jòng, ai lài ngan tàm gùng dà broă lơh bal mờ lơgar ndai lơgar Việt Nam dê.

Bè bơta git gơ̆p bal đah bàr lơgar Việt Nam mờ Lo, Thủ tướng Cíñ phủ ồng Phạm Minh Chính đơs niam bơta git gơ̆p bàr Đảng, bàr lơgar tàm tơngai do geh gơguh sùm mờ bơtàu tơnguh, mŭt tus tơngai bơtàu tơnguh pa mờ jơnau kờñ bơ̆t bơtàu Mpồl bơtiàn tam pà bal tơnơ̆ do đah lơgar Việt Nam mờ lơgar Lo geh kwơ màng jŏ jòng jăt gùng dà broă lơh “6 rơlao”. Thủ tướng sồr bàr gah pơn jăt tai tơnguh broă tam pơgơl bal, tìp bal kấp dờng; lơh pràn lơh broă bal mùl màl tàm ală gah broă geh nền nòn, tàm hơ̆ geh tơrbŏ gùng lòt, tàm hơ̆ ai lài lơh mhar lơh 03 gơl gùng rơndeh ồs geh khà niam tơrbŏ đah lơgar Việt Nam mờ lơgar Lo (Lài Cai - Hà Nội - Hải Phòng, Lạng Sơn – Hà Nội, Móng Cái – Hạ Long – Hải Phòng) nàng lơh pràn broă tơrbŏ bal bàr gah lơh sa.

Kung tàm dơ̆ tus Pơrjum kấp dờng ală Kwang đơng lam bồ mpồl BRICS pờ ơnàng geh bơyai lơh tàm ƀòn dờng Kazan, lơgar Nga, Thủ tướng Cíñ phủ ồng Phạm Minh Chính neh tìp Kwang atbồ lơgar Kazakhstan, Kwang atbồ lơgar Turkmenistan mờ Thủ tướng lơgar Ethiopia.