Đơs tàm dơ̆ cribơyai, Kwang atbồ lơgar Nga ồng Vladimir Putin gờm chờ mờ ưn ngài Thủ tướng Cíñ phủ ồng Phạm Minh Chính bal mờ Mpồl ala mat Kwang bàng kấp dờng lơgar Việt Nam neh tus bal pơrjum. Bàr gah niam nùs sền gŏ bơta gĭt gơ̆p Lơh broă bal kwơ màng tơl làm tàm tơngai pa do sùm geh bơt bơtàu mờ bơtàu tơnguh jơh bal mờ broă lơh jrô ơnàng làm uă mờ mut lơh broă ngan ngồn; ală dơ̆ lòt còp, ală dơ̆ tìp mat, tìp mat ală kấp, ngan là kwang bàng kấp dờng geh bơyai lơh duh hồl ngan; priă lơh geh kă bro phan đah 2 gah gơguh pràn kơl dang.

Bàr nă kwang đơng lam bồ đơs là cồng nha do ờ hềt lơh geh jơnau kờñ geh ai, pal pơgồp bal niam rlau tai nàng lam lơh geh cồng nha lơh broă bal, ngan là tàm gah lơh sa, kă bro phan, bơcri priă, lòt nhơl. Thủ tướng ồng Phạm Minh Chính mờ Kwang atbồ lơgar Nga ồng Vladimir Putin kung cribơyai ală gùng dà pơlam mờ broă lơh ngan ngồn nàng tơnguh uă cồng nha lơh broă bal tàm ală gah ndai bè jak chài- măi mok, bơto bơtê mờ bơsram, gùng lòt jun pơndiang phan.