Tàm nùs nhơm lơh bơyô bal, sơrmah sơrmài mờ jơh nùs, 2 nă Thủ tướng jờng rơ uă ngan ală broă lơh bơtàu tơnguh uă tàm bơta gĭt gơ̆p đah 2 gah đah lơgar Việt Nam mờ Saudi Arabia tàm 25 nam do mờ ring bal lơh broă bal niam nàng ai bơta gĭt gơ̆p 2 lơgar dê bơtàu tơnguh tus gơnoar broă pa.

Tàm ală bơta hơ̆, 2 nă kwang đơng lam bồ ring bal sơlơ tơnguh tai tàm pơgơl mpồl kwang bàng ală kấp, is ồn là mpồl kwang bàng kấp dờng jơh bal đah 2 gah mờ bơdìh ală dơ̆ pơrjum uă lơgar dê; ai lơh broă bal lơh sa gơ gơs bơta tờm bơta gĭt gơ̆p đah 2 gah, ai lơgar Saudi Arabia gơ gơs dùl tàm ală lơgar bơcri priă lam lài tàm Việt Nam mờ wèt tus broă tơnguh priă lơh geh kă bro phan đah 2 gah gơguh tus 10 tơmàn dolar Mỹ tàm nam 2030. Sền gĭt bơta tờm lơh broă bal bơh 2 lơgar dê là tam gơl pa bơceh lơh, tam gơl tơlir, tam gơl sồ; ai bơto bơtê, lòt nhơl, lơh broă, tìp mat lơh kwèng làng bol gơ gơs bơnàng jă kơ̆ kơl jăp ai bơta gĭt gơ̆p đah 2 lơgar dê.