Jat jơnau yal, 9 nhai lơh sa - mpồl bơtiàn Dà lơgar lơh geh uă cồng nha kwơ màng, uă rlau pơndrờm mờ dùl tŭ bal tàm jơh ală gah broă. Kờp dŭ lài jơh gùt nam geh 14 tàm 15 broă jàu lơh geh mờ sơr lèt broă rơndăp lơh. Lơh sa dờng pơn jat tai kơ̆ kơl jăp, roh giă priă geh gròi sền, gơguh lơh sa jơnhoa rlau mờ jơnau kờñ geh ai.

Bè ală kơnòl broă, broă lơh ală nhai lồi nam 2024, Thủ tướng ồng Phạm Minh Chính đơs loh: ală kấp, ală gah broă, ală tiah jat tàm gơnoar broă, gơnăp gơnoar he dê pơn jat tai tơrgùm lơh jat dồ ròt bal, geh cồng nha ală kơnòl broă, broă lơh tàm ală gah. Tàm hơ̆, pơn jat tai lơh ngan bơsong jơnau gơ lời wơl tài bơh trồ tiah lơh aniai, ngan là mìu càl rơbŭt dờng sồ 3 dê lơh aniai; rcang lài, jơh nùs hòi jà tă pơgồp uă ngan rlau jơh priă jền nàng lam lơh mơ ală broă dong kờl, tàm hơ̆ gàr niam ờ gŏ di lời làng bol ờ tơl sa, ờ tơl soh, ờ tơl tiah ơm; ală kơnòm bơsram pal geh lòt bơsram, cau kòp pal geh sơm kòp; dong kờl kòn sơntìl, tờm chi sơntìl, bơtàu tơnguh wơl mờ bơtàu tơnguh lơh sa broă lơh sa, phan brê mờ phan tàm dà.