Bơh bồ tơngai lơh broă tus tŭ do, Quốk hội neh ring bal 43 adăt, rơlao 60 jơnau lơh nền; Anih duh broă Lơh kơnòl broă sùm Quốk hội neh ai lơh jăt 45 jơnau lơh nền tàm pơrjum mờ 3 adăt boh lam sồr.

Tổng Ƀí thư, Củ tịc lơgar ồng Tô Lâm kung sồr Quốk hội pal gờñ kơlôi sơnơng nàng git loh gùng dà broă lơh, broă jăt sền dờng rơlao jơh bơh Quốk hội dê di pal mờ mùl màl, pleh ndrờm bal mờ broă lơh bơh ală anih lơh broă ndai Dà lơgar dê lơh gơbàn pơhì pơhà. Pơn jăt tai tơnguh uă bơta niam broă lùp mờ hơ jơnau lùp, broă mblàng yal lơh loh, jăt sền sră nggal adăt boh lam; sền kwơ broă sền gròi, sền sơwì, lam lơh broă lơh jăt ală jơnau đơs tơnơ̆ jăt sền. Tàm gơl pa broă pơlam lơh jơnau lơh nền bè kes priă Dà lơgar geh tơl mùl màl, lòt bal mờ jăt sền broă lơh jăt kes priă, rơhời ala broă ai ngui ală jơnau lơh nền tàm pơrjum mờ bơh ală adăt bè priă jền, kes priă. Tàm pơrjum do, khà ală broă lơh bè jăt sền mờ lơh nền ală bơta kwơ màng bơh dà lơgar dê kung dờng ngan, mùl màl gam geh ai, cau tĕ khà gam kơ̆p gơn; sồr ală cau ala măt Quốk hội ngui gơnoar, kơnòl bơh să tờm dê tàm broă cri bơyai mờ ai geh ală bơta kwơ màng do.