Kwang đơng lam bồ 2 gah tơlik nùs nhơm chờ hờp bal tềng đăp ală bơta bơtàu tơngguh uă ngan, sơrlèt uă bơh gĭt gơ̆p bàr Đảng, bàr lơgar tơnơ̆ tŭ tơngguh broă gĭt gơ̆p gơguh tus Mpồl bơtiàn tam pà tơnơ̆ do geh gơtha jŏ jòng; lơh broă bal sền gàr dà lơgar geh 2 gah sền gròi lơh pràn, ngai sơlơ geh kwơ ngan mờ geh cồng nha.

Tổng Ƀí thư ồng Tô Lâm đơs nền, Đảng, Dà lơgar, Ling klàng mờ Làng bol Việt Nam sùm sền dờng màng mờ kah sùm bơta dong kờl dờng ngan bơh Đảng, Dà lơgar, Ling klàng mờ Làng bol lơgar Lo tàm broă lơh kăc màng, tam dră ai wơl lơngăp lơngai is mờ dong klàs jơi bơtiàn lài do kung bè tàm bơ̆t bơtàu củ nghĩa xã hội tŭ do. Tổng Ƀí thư ồng Tô Lâm sồr ling klàng 2 gah dê sơlơ lơh broă bal, pơgồp bal sok sền mờ bơsong niam rlau bơta ờ ring bal, gàr sùm ring lơngai, kơ̆ kơl jăp tàm dà lềng; bơsong bơta ờ ring bal bơh ală broă lơh bơsong ring lơngai, pal dipal mờ gĭt wă bal kwang bàng kâp dờng mờ adăt boh lam ală lơgar dê.