Tàm dơ̆ wă rò, Thượng tướng ồng Phạm Hoài Nam jờng rơ ngan broă Ƀộ Ling klàng lơgar Nhờk mờ Kes priă Ring lơngai Sasakawa lơgar Nhờk dê neh pơgồp bal kơ̆ kơl jăp mờ Ƀộ Ling klàng lơgar Việt Nam lam lơh Broă lơh tìp măt lơh kwèng ling geh griăt kâp tá, kâp úy Việt Nam mờ Nhờk tàm 07 nam do. Thượng tướng ồng Phạm Hoài Nam đơs sùm Việt Nam sền dờng màng tơngguh tai tìp măt lơh kwèng, lơh broă bal đah ală mpồl, mpồl cau mờ sền do là đah lơh broă bal geh cồng nha tài bơta kwơ bơh làng bol 2 lơgar dê.

Thượng tướng ồng Phạm Hoài Nam kơ̆p kờñ Kes priă Ring lơngai Sasakawa lơgar Nhờk dê pơn jăt tai sền gròi lam lơh lơh broă bal, dong kờl Việt Nam tàm bơto bơtê, lơh sơnơm, tiah ơm kis, bơto mpồl cau lơh broă, is ồn là broă dong kờl kòn bơnus bè dong kờl cau kwĕt kơlte, cau ling sồt să cau ling kòp tê jê să mờ cau gơtìp sơnơm khih dioxin lơh aniai.