Ngai 18/4/1976, ală cau tàm mpồl lam gùng Gia Lâm sơn rờp geh mat tàm Nam Ban. Pơn jat hơ̆, ală đoàn ơruh pơnu bơh Từ Liêm, Đông Anh, Thanh Trì, Ba Đình, Đống Đa mờ uă tiah bơh Hà Nội dê dơ̆ dùl dơ̆ lòt gùng. Mìng tàm rlau 2 nam, rlau 2 rơbô 600 nă ơruh pơnu lam gùng neh rồ rlau 1 rơbô 900 lồ ù, pờ gĭt nđờ kơi sồ gùng lòt rê, bal mờ làng bol ală jơi bơtiàn tàm tiah do dê bơt hìu, bơtàu tơnguh lơh sa, lơh geh ală ƀòn lơgar pa.

Bơh 50 nam bơt bơtàu mờ bơtàu tơnguh, tiah lơh sa pa Hà Nội tàm Lâm Đồng neh lơh geh ală tiah tam kơphê, broă lơh sa suơn sre ngui măi mok pa; bơt bơtàu gùng lòt rê, hìu bơsram, hìu sơnơm geh bơcri priă lơh, rài kis làng bol dê ngai sơlơ tam gơl.

Mat sơnđan Lâm Hà, pơgồp bal bơh Lâm Đồng mờ Hà Nội tŭ kơnhoàl geh tơnggơs nam 1987, gơs pơrya tam klăc bal đah 2 tiah dê. Đơs tàm dơ̆ tơngkah kir sơnrai, ồng Hồ Văn Mười, Kwang bàng Đảng Dà lơgar, Chủ tịch Anih duh broă Làng bol càr Lâm Đồng, đơs nền cồng nha 50 nam là tơrgùm bơh dà kơl hề, bơta jàu phi mờ nùs nhơm tam klăc bal bơh uă rơnàng dê.  "Sền wơl gùng lòt 50 nam, bol he geh ală bơta nàng đơs nền hơ̆ ờ mìng là broă lơh rồ ù dùl tiah lơm mờ gam là gùng lòt bơceh lơh rài kis dê, bơt bơtàu bơta pin dờn mờ bơt bơtàu rài tơnơ̆ do ai uă rơnàng in. Cồng nha hơ̆ ờ mìng geh was mờ ală broă lơh bơt bơtàu, gơl gùng lòt rê halà ală tiah lơh sa pa lơm mờ gam tơngŏ  tàm tơl rơkàng hìu kơ̆ kơnhăp, ală ơdŭ bơsram gal cau chờ hờp, tơl hìu bơnhă geh rài kis kơ̆ kơl jăp rlau”.

Tơngkah kir sơnrai 50 nam tiah lơh sa pa Hà Nội tàm ù tiah Lâm Đồng dê, uă broă lơh niam chài, tàp pràn să jan neh geh bơyai lơh. Tàm do, lơh chờ sàl ờs mờng, ràng tơlik sră nggal kah yau mờ yal tơngĭt phan bơna OCOP geh bơyai lơh tàm tiah Lâm Hà, lơh tơngŏ wơl gùng lòt bơt bơtàu tiah lơh sa pa mờ bơta tàm tìp niam chài đah 2 tiah dê.

Di dơ̆ do, càr Lâm Đồng mờ ƀòn dờng Hà Nội neh kĭ hơ sră cih kah lơh broă bal tơl làm. Anih duh broă Mặt trận dà lơgar Việt Nam ƀòn dờng Hà Nội jàu pơn yơu dong kờl rlau 1 tơmàn 300 tơlak đông lơh 22 nơm hìu Tam klăc dờng ai ală hìu bơnhă kal ke in. Càr Lâm Đồng kung jờng rơ pà phan ƀàn ală mpồl cau, cau dồ nă să mờ hìu bơnhă geh uă tă pơgồp tàm bơt bơtàu, bơtàu tơnguh tiah lơh sa pa. 

50 nam lài, ală cau kòn Hà Nội cèng jat bal bơta pràn cau kơnòm să mờ bơta kơ̆p kờñ tus mờ tiah kơh bơnơm Lâm Đồng rồ ù tiah, lơh broă sa. Tŭ do, ală rơnàng tàm pơrdờn gam lơh jat niam cồng nha hơ̆ mờ bơta gĭt wă, măi mok mờ nùs nhơm tam gơl pa.