Dờp jơnau jà bơh ồng Lê Minh Hưng, Thủ tướng Chính phủ, ồng Donald Tusk,Thủ tướng lơgar Cộng hòa Ba Lan còp ngan ngồn lơgar Việt Nam bơh ngai 24-26/10/2026. Drim ngai 26/10, tàm Hà Nội, tơnơ̆ dơ̆ wă mờ cribơyai kấp dờng, ồng Lê Minh Hưng, Thủ tướng Chính phủ mờ ồng Donald Tusk- Thủ tướng lơgar Ba Lan neh đơng lam pơrjum ƀăo bal, ngan ngồn yal tơnguh bơta gĭt gơ̆p đah 2 lơgar gơguh tus Tam klăc lơh broă bal Jŏ jòng.

Broă tơnguh bơta gĭt gơ̆p tơngŏ nùs nhơm lơh ngan bơh đơng lam bồ 2 lơgar dê tàm broă sơlơ tơnguh tai bơta pin dờn chính trị, pờ ơnàng lơh broă bal ngan ngồn mờ ngui geh cồng nha bơta pràn bơh tơl gah dê. Bàr lơgar rơ̆p pơn jat tai sơlơ tơnguh tai tàm pơgơl mpồl kwang bàng kấp dờng, sơlơ tơnguh tai pơgồp bal đah ală anih lơh broă, mpồl lơh broă mờ ală tiah; mơkung pờ ơnàng lơh broă bal tàm ală dơ̆ pơrjum uă lơgar, ngan là Liên hợp quốc. Tàm gah lơh sa, kă bro phan mờ bơcri priă, Việt Nam mờ Ba Lan wèt tus lơh pràn lơh broă bal jat tàm ală bơta Jơnau kĭ hơ Kă bro phan khat gơboh Việt Nam mờ Mpồl tam klăc châu Âu, lơh geh ală bơta ƀuơn ai mpồl lơh sa kă bro 2 lơgar in. Ală gah geh uă bơta ƀuơn, geh broă lơh sa suơn sre, lơh sa mờ măi mok lơh gơlik phan, năng lượng lơh gơlik wơl, tam gơl sồ, gùng lòt rê jun pơndiang, phan lơh sơnơm mờ măi mok phan bơna lơh sơnơm. Bàr gah kung sền gròi sơlơ tơnguh tai lơh broă bal bơto bơtê, jak chài, niam chài, lòt nhơl mờ tìp mat lơh kwèng làng bol; mơkung sơlơ tơnguh tai pơgồp bal tàm ală broă ală lơgar, tàm tiah do, jat tàm ală bơta adat boh lam ală lơgar mờ Sơnoa boh lam Liên hợp quốc dê.