Ngai òr (25/10), lòt sền broă lơh ală rơndăp broă tờm mờ lơh broă mờ kwang đơng lam càr An Giang, ồng Trần Thanh Mẫn, Chủ tịc Quốc hội đơs nền nùs nhơm “3 ờ”: ờ tơrmù tơngai geh ai, ờ tơrmù bơta kơl jăp broă lơh, ờ lời gơtìp tìs. Ală anih lơh broă, mpồl lơh broă pal pơgồp bal nền nòn, di tŭ bơsong kal ke, ai tơngŏ loh làng kơnòl broă bơh cau lam bồ mờ lơh mhar broă lơh tus tơl rơndăp broă.

Ồng Trần Thanh Mẫn, Chủ tịc Quốc hội sồr ală broă lơh, rơndăp broă lơh drơng Pơrjum kấp dờng APEC 2027 tàm tiah is ồn Phú Quốc, càr An Giang, pal lơh gơs lơyài ngan ngai 30 nhai 6 nam 2027. Chủ tịch Quốc hội kung sồr pal gàr niam ală broă lơh geh lơh broă ndrờm bal, sền kwơ phan bơna gùng lòt, ồs đèng, dà, bơsong dà tơlik, siồ siă, lơngăp lơngai mờ rơcang kơrian mờ crùh ồs sa. Broă lơh ƀòn ơm kis pa pal geh lơh niam, gàr niam làng bol ai ù lơh rơndăp broă in geh bă ù nàng lơh hìu ơm kis kơl jăp, ndrờm ha là niam rơlao tàm ƀòn ơm kis lài do. Broă lơh di tơngai geh, kơl jăp mờ di mờ jơnau geh ai tàm adăt boh lam dê rơ̆p pơgồp bal tàm broă lơh geh cồng nha Pơrjum kấp dờng APEC 2027 dê, mờ yal rùp rài lơgar Việt Nam mờ bơyô ală lơgar.