Tàm thôn 12, sàh Bảo Lâm 1, uă hìu làng bol neh rơcang sờr pơngàr, broă lơh tềng đăp hìu nàng jào ù lơh gùng lòt. Geh ală hìu pal sờr broă lơh tàm bă ù ơnàng, mơya tŭ geh gơnoar atbồ lam sồr, mblàng bè bơta kwơ jŏ jòng, làng bol neh ring bal, ai geh bơta ƀuơn nàng mpồl lơh gùng in lơh broă. Sền gŏ nùs nhơm ring bal bơh làng bol dê, ồng Võ Chí Nhân, Lam bồ thôn 12, sàh Bảo Lâm 1 chờ hờp pà git: “Làng bol ring nùs bal ngan mờ chờ hờp ngan tŭ dờp geh jơnau kờñ lơh gùng do. Làng bol tŭ do uă ngan là neh tă sờr broă lơh jào ù nàng mpồl lơh gùng in lơh broă do. Bol añ kơ̆p kờñ là tơnơ̆ mờ tŭ gùng do geh lơh gơs rơ̆p ƀuơn ngan tàm broă lòt rê làng bol dê, bal mờ broă lòt bơsram sră bơh ală oh kòn dê tai”.

Bơh broă ring bal tàm dùl broă lơh gùng lòt pà gŏ, tŭ gơnoar atbồ rơcang lài tus mờ làng bol, mblàng loh gơnoar kwơ bal mờ kơnòl, ală gơkòl geh tai bơta geh bơsong. Broă lơh hơ̆ kung gam geh uă sàh, sơnah ƀòn tàm càr Lâm Đồng ngui tàm broă bơsong ală broă gam gơlời gơrềng tơn tus rài kis làng bol dê. Tàm sàh Bảo Lâm 3, ù tiah là dùl tàm ală gah broă gơlik geh uă jơnau sồr. Tàm dơ̆ tìp mờ cau tĕ khà mìng dùl tơngu me lồi nhai 9, làng bol yal ală gơkòl bè gơ rơndăp bal jơnau tơngit ù tiah, ai sră dờp gơnoar ngui ù, tam cah bă ù mờ priă tơm bơtơl.

Tềng đăp mờ bơta mùl màl do, gơnoar atbồ sàh tơrgùm tam cah is ală broă, ai tơngŏ kơnòl bơsong, wèt tus tơrmù bơta kal ke mờ tơrmù tơngai bơsong. Bè broă ai geh gùng dà bơsong ală jơnau gam gơlời do, ồng Vũ Minh Đoàn, Phó Chủ tịch Anih duh broă Làng bol sàh Bảo Lâm 3 đơs nền: “Bol añ gam tơrgùm bơsong ală broă gam gơlời, tàm hơ̆ uă ngan là sră nggal bè ù tiah. Ală broă lài do ờ hềt geh bơsong gam geh sền wơl, bơsong jơh, nàng ai tơl bơta ƀuơn ngan làng bol in tŭ lơh jăt broă lơh gơnoar atbồ ƀòn lơgar 2 kấp”.

Ờ mìng ală sră nggal, ală rơndăp broă bơcri priă jŏ jòng uă nam kung gam geh ai jơnau kờñ pal tam gơl broă bơsong. Tàm sàh Dà Huoai 3, rơndăp broă lơh Hìu măi pờ tơlik ồs đèng dà Dà Huoai 2 mờ ală gơkòl rơlao 20 nam là dùl tàm ală broă kal ke geh sàh tơrgùm nàng bơsong. Bơta gơkòl dờng ngan là ai geh nùs nhơm ring bal tàm broă tơm bơtơl, ntrờn ù tiah. Bơh 8 dơ̆ pơrjum, cri bơyai tơn, gơnoar atbồ sàh neh rơhời bơsong ală jơnau đơs bơh làng bol, ai geh bơta niam nàng was, kờp sền mờ lơh jăt ală broă lơh pơn jăt tai. Đơs tus mờ ală tam gơl tàm broă bơsong rơndăp broă lơh, ồng Nguyễn Văn Trinh, Chủ tịch Anih duh broă Làng bol sàh Dà Huoai 3 yal: “Tơnơ̆ 8 dơ̆ pơrjum, bol añ hòi jà jơh mpồl lơh broă chính trị yal tơngit, mblàng mờ bơsong ală gơkòl bơh làng bol dê. Tus tŭ do, rơndăp broă lơh neh dờp geh nùs nhơm ring bal. Sàh gam pơgồp bal nàng was, kờp sền nàng tơm bơtơl, lơh geh bă ù, lơh ngan nàng rơndăp broă lơh geh mŭt lơh tàm nam 2026”.

Ală broă gơlòt tàm sàh Bảo Lâm 1, Bảo Lâm 3 mờ Dà Huoai 3 là ală bơta tơngŏ tàm broă lơh ngan bơsong kal ke, lơh geh bơta pràn bơtàu tơnguh càr Lâm Đồng dê.

Jơnau yal lơh sa mpồl bơtiàn 9 nhai nam 2026 pà gŏ, kờp jơh priă bơcri geh lơh tàm gùt mpồl bơtiàn càr dê geh rơlao 84 rơbô 100 tơmàn đong, gơguh rơlao 12% pơn ndrờm mờ tŭ do nam lài. Gùt càr geh mờr 3 rơbô rơndăp broă bơcri priă gam geh lơh, kờp jơh priă dan lơh rơlao 947 rơbô tơmàn đong. Mơya, ală gơkòl bè ù tiah, ai geh bă ù, sră nggal bơcri priă mờ bơta pràn lơh kung gam lơh gơrềng ờ niam tus mờ tơngai lơh uă rơndăp broă dê.

Tềng đăp mờ jơnau kờñ lơh geh ală bơta pràn bơtàu tơnguh, ồng Y Thanh Hà Niê Kdăm, Bí thư Tỉnh ủy càr Lâm Đồng ai geh jơnau sồr tam gơl pa bồ tơngoh đơng lam, tơnguh uă kơnòl broă mờ cồng nha lơh broă tàm gùt mpồl lơh broă chính trị: “Gùt mpồl lơh broă chính trị pal tam gơl mhar bơh bồ tơngoh đơng lam tus mờ bồ tơngoh bơceh lơh bơtàu tơnguh, bơh bơta lơh ngan nàng lơh gơs tus cồng nha mùl màl. Tơrgùm bơsong ală tiah gơkòl bơtàu tơnguh, lơh mhar broă lơh ală rơndăp broă tờm, ală rơndăp broă gam gơlời, jŏ jòng mờ tơnguh uă cồng nha ai priă bơcri dà lơgar. Pơn jăt tai tơnguh uă nùs nhơm geh kơnòl, đơs lòt bal mờ lơh broă, lơh jăt kơnòl geh jào, sùm lòt sền, lam lơh, di tŭ bơsong kal ke, gơkòl, lơh ngan ai geh tam gơl loh làng tàm ală nhai lồi nam 2026, lơh gơs uă ngan ală jơnau kờñ neh geh ai”.

Bơh ală broă rài kis lơh sa làng bol dê tus mờ ală rơndăp broă lơh gam gơlời uă nam, tam gơl tàm ƀòn lơgar pà gŏ cồng nha lài ngan tàm broă đơng lam gơnoar atbồ ƀòn lơgar 2 kấp tàm càr Lâm Đồng dê. Nàng ală cồng nha do geh lơh uă mờ gơguh, bơta kwơ màng là pơn jăt tai bơsong broă lơh tus gùng, lơh broă lơh ngan gơs cồng nha mùl màl, ai geh tai bơta pràn nàng càr Lâm Đồng in bơtàu tơnguh.