Ngai lồi poh, hìu nhă mò Rcom H’ Kliơng tàm ƀòn Rưng Ma Nin, sàh Ia Rbol, càr Gia Lai geh bơyai lơh dơ̆ ñô tơrnờm chờ hờp tài mò pa geh Mpồl Dong kờl pơlam bơsram sră Việt Nam jào sră jờng rơ. Ala măt cau hìu nhă kung pa tus bal Pơrjum jờng rơ ală broă lơh bơsram sră pơnrơ jăk gùt lơgar tàm Càr lơgar Hà Nội rê.

Ồng Nay Nhơn, bơrtơu dờng bơh mò Rcom H’ Kliơng, là cau pơgru neh jơh sơnơm bơto đơs là, dơ̆ ñô sa chờ ai tơngŏ nùs nhơm git ưn ngài mè bèp neh sền gròi tus mờ broă bơsram sră oh kòn dê: “Hìu nhă bol añ, bŭ lah lài do gơtìp kal ke, rơnàng mò ồng, mè bèp lơh broă glar bòl, lơh suơn mìr mơya kung gam ròng oh kòn bơsram sră nền nòn. Tus tŭ do, rài kis hìu nhă bol añ neh kơl jăp mờ oh kòn pơn jăt tai lòt bơsram sră tus gùng tus dà. Mè bèp neh lơh ngan nàng oh kòn in geh bơsram sră, kal ke kàr lơi kung sơrlèt jơh, kơ̆p kờñ oh kòn bơsram sră jăk chài, gơs cau geh kwơ ai ƀòn lơgar mờ lơh broă tàm mpồl bơtiàn. Hơ̆ là jơnau nting bơto, jơnau lam sồr bơh mè bèo dê ai oh kòn in. Bơh tŭ hơ̆, oh kòn dờn jơnau mè bèp bơto, lơh jăt gùng dà broă lơh bơh Đảng mờ adăt boh lam bơh Dà lơgar dê”.

Mò H’ Kliơng pà git, ală kòn mò dêt dờng tơnơ̆ mờ tŭ dà lơgar geh tơnklàs. Rài kis tàm tiah brê bơnơm Ia Rbol, càr Gia Lai tŭ hơ̆ kal ke ngan. Neh geh tŭ hìu nhă mìng geh tơngời coh, bùm blàng, geh tŭ pal ơ̆t sào. Tàm bơta kal ke hơ̆, ùr bơklao mò kung gam lơh ngan drơng nàng ală oh kòn in geh lòt bơsram, tềm pềr tơl nai bùm blàng, đo tơngời; geh tŭ lời piang nàng ală oh kòn in sào lòt bơsram sră. Mò pơnyờ să tài jơh 9 nă kòn (5 nă kòn ùr, 4 nă kòn klao) ndrờm bơsram sră geh cồng nha; geh cau bơsram gah lơh sơnơm, geh cau bơsram gah lơh pơgru, geh cau lơh broă tàm ling klàng ha là anih lơh broă dà lơgar bơh kấp sàh tus kấp càr. “Lài do, bŭ lah hìu nhă gơtìp kal ke, lơh broă glar bòl, mơya pal drơng nàng ală oh kòn in geh lòt bơsram. Geh tŭ piang sào ờ tơl, ào soh ờ geh, añ kung gam lơh ngan nàng ală kòn in geh lòt bơsram sră. Tài añ kơlôi là, ală kòn geh gơboh gơbài là geh bơsram sră, tơnơ̆ do geh jơnau git wă nàng lòt lơh broă, ròng is să tờm. Añ neh rơlao 78 sơnam bloh, kơ̆p kờñ ală oh mi tàm ƀòn lơh ngan ai oh kòn in lòt bơsram. Geh lòt bơsram den hơ̆ sồng geh rơnàng tơnơ̆ do niam bơnĕ, dong kờl ƀòn lơgar, mpồl bơtiàn”.

Ồng Nay Mun, Chủ tịch Mpồl Dong kờl bơto pơlam bơsram sră sàh Ia Rbol, càr Gia Lai pơnyờ să sàh Ia Rbol là ù tiah geh uă bơhiàn bơsram sră jăk. Pơnrơ ngan bè hìu nhă ồng Ksor Chuel tàm ƀòn Rưng Ma Nhiu geh jờng rơ là “hìu nhă cử nhân”. Hìu mò Rcom H’ Kliơng tàm ƀòn Rưng Ma Nin pa geh Mpồl Dong kờl pơlam bơsram sră Việt Nam jào pà sră jờng rơ tài neh geh cồng nha jăk ngan tàm broă bơsram sră jơh rài. Bơh tŭ hơ̆, pơgồp bal tàm lơh broă geh uă cau kờñ gơboh mờ broă bơsram sră sàh dê: “Mò Rcom H’ Kliơng geh 9 nă kòn ndrờm bơsram sră geh cồng nha. Tŭ do ală kòn neh jơh bơsram mờ mŭt lơh broă tàm ală anih lơh broă dà lơgar. Kơ̆p kờñ làng bol ƀòn lơgar he bơsram bal tàm broă lơh do bơh hìu nhă mò dê. Mờ hòi jà, lam sồr làng bol ƀòn lơgar rềp ngài, mblàng yal nàng ală hìu nhă lơh ngan lơh broă sa mờ ròng oh kòn lòt bơsram tus gùng tus dà, tơnơ̆ do mŭt lơh broă tàm anih lơh broă dà lơgar, drơng broă làng bol, drơng broă ƀòn lơgar in”.

Hìu nhă mò Rcom H’ Kliơng ñô sa chờ tài geh Mpồl Dong kờl pơlam bơsram sră Việt Nam jào pà sră jờng rơ là dơ̆ nàng tơlik nùs nhơm git ưn ngài uă ngan tus mờ broă ờ ngòt glar bòl, kòl jan kal ke bơh mè bèp dê neh nàng ai oh kòn in bơsram sră tus gùng tus dà. Hơ̆ là nùs nhơm gơboh kờñ bơsram sră geh pơn jăt sùm bơh ală rơnàng dê, mờ pơgồp bal tàm broă lơh geh uă ală bơta kwơ niam bơnĕ tàm rài kis mpồl bơtiàn.