Jăt tơrgùm kờp, tàm 05 nam bơh nam 2021 tus nam 2025, trồ tiah lơh aniai neh lơh 1 rbô 455 nă cau chơ̆t mờ roh thĭt, lơh gơbàn hoàc hươr rlau 230 rbô tơmàn đong; is nam 2025, hoàc hươr sơrlèt 100 rbô tơmàn đong. Jơnau rơcăng cih broă rơndăp lơh tơngai bơh nam 2026 – 2030 tơrgùm tàm ală gùng dà broă rơndăp lơh drơng wơl mìu càl rbŭt pràn, mìu càl rbŭt pràn ngan, dà lìu dà kŏ, tơrlah tơrlơm ù, dà lìu dà cò, prăng soăt dà mờ dà hăng mŭt tàm ù gờl.

Đơs pơndŭt dơ̆ pơrjum, ồng Hồ Quốc Dũng, Phó Thủ tướng Chính phủ sồr gờñ ai lơh jăt broă rơndăp lơh bal mờ ală kơnòl broă, gùng dà broă rơndăp lơh loh làng, geh bơta gơtùi lơh jăt ngan ngồn, gơcèng broă ndrờm pal dà lơgar, gàr niam bơta pơgồp bal ală gah, ală tiah mờ ală càr. Broă rơndăp lơh pal sền swì gĭt nền loh kơnòl bơh Dà lơgar mờ ƀòn lơgar dê; đal gŏ ală bơta trồ tiah lơh aniai sơbơng roh jăt tơl kơnhoàl ù tiah; pơgồp bal rơcăng, drơng trồ tiah lơh aniai tàm rơndăp ù tiah, broă rơndăp lơh mờ ală rơndăp broă lơh, broă lơh bơ̆t bơtàu.