Tàm bàr ngai do, tàm uă tiah càr Kon Tum neh geh mìu di mơ tus mìu sơr. Càr Kon Tum sồr gơnoar atbồ ală kơnhoàl, ƀòn dờng bal mờ mpồl lơh broă gơrềng bal jăt sền nền nòn bơta tàm trồ tiah; geh sùm nền nòn broă rơcang lài, rơcang lòt sền, sền wơl, lơh wơl ală gùng dà broă lơh, broă rơndăp nàng rơcang sơndră. Hòi jà mpồl lơh broă, phan lơh broă rơcang sơndră, bơsong di tŭ, geh cồng nha ală bơta gơlik geh. Sền wơl nền nòn ală tiah ƀòn ơm kis, broă lơh tờm, di tŭ gŏ bơta di gơlan gơtìp ờ kơl jăp, rơcang lài ai mpồl lơh broă, phan lơh broă, lơh ngan ntrờn làng bol lik bơdìh tiah ngòt rơngơ̆t, gàr niam màng kis, tơrmù ờ uă ngan hoàc huơr phan bơna Dà lơgar bal mờ Làng bol dê.

Anih duh broă Làng bol càr Gia Lai geh Sră nggal mhar bè broă tơrgùm drơng mờ mìu dờng, pơhìn gơlik geh dà kŏ dà cò, ngơr bam dà, tơrlah ù tàm tiah do dê. Càr sồr ai mơ tơn mpồl lơh broă lam lài lòt sền, kờp sền ală tiah làng bol ơm kis jat kềng gah dà dờng, dà croh, tiah thòng lơyah nàng rcang lài lam ntrờn làng bol tus tiah ơm lơngăp lơngai. Ai mpồl cau ơm gak, crăp kƀàng yal tơngĭt lài tàm ală tiah dà lìu, dà ñhăng. Crăp rcang mpồl cau, rơndeh rơndồ măi mok nàng bơsong bơta aniai, gàr niam gùng lòt rê bè ờs. Rcang lài lam lơh ală broă lơh sền gàr broă lơh sa suơn sre, gàr niam lơngăp lơngai ai ală tiah lơh sa mờ măi mok, tiah drà, tiah làng bol ơm kis mờ ală broă lơh ngui phan kwơ tàm ù tàm ală tiah geh pơhìn gơtìp gơrềng. Ală cau sền gàr tơnau dà, hìu măi pờ tơlik đèng dà lam lơh broă, jat sền niam mìu dờng mờ dà tih tàm ală tơnau dơng dà; lơh jat tam pà dà di pal nàng gàr niam lơngap lơngai broă lơh bơt bơtàu mờ tiah tàm thòng lơyah.