Bơh dùl ƀlàng bràs lời gời, Tiah kah kơlôi cau ling Gạc Ma tŭ do neh gơs “ù tiah tam lơh” bơto bơtê bơhiàn ờs mờng bơh yau mờ bơtơl tai nùs nhơm kờñ gơboh dà lơgar ai uă rơnàng in. Pah nam, gĭt nđờ jơ̆t rơbô dơ̆ làng bol, kwang bàng, cau ling, đoàn viên, ơruh pơnu mờ năc lòt nhơl bơh gùt ală kơnhoàl ù tiah dà lơgar dê jòi rê chu ñàng kah kơlôi ală cau ling neh chơ̆t phi să tàm dơ̆ tam lơh dà lềng Gạc Ma nam 1988, nàng sền gàr gơnoar tờm dà lềng, bồt bơlào dờng màng bơh Dà lơgar dê. Bi Nguyễn Thị Thanh Hà, cau lơh broă Tiah kah kơlôi Gạc Ma pà gĭt, ală ngai nhai 3, pơgồp bal mờ broă lơh kah yau do, mpồl cau tus chu ñàng, kah ưn ngài ală cau ling khin cha jak chài, cau ling chơ̆t màng sơlơ gal ngan, tơngŏ bơta kah ưn ngài uă ngan bơh ală rơnàng tŭ do dê gơwèt mờ ală cau ling neh chơ̆t phi să tài dà lềng bồt bơlào dà lơgar dê:“Tiah do lài do mìng là dùl gơnru bràs lơm, chi che gơ lơh bè ờ hềt geh. Tơngai pa do, bol añ neh tam tai uă tờm chi nàng lơh geh nhjơm lơngơm. Tus tŭ do, tờm chi neh dờng niam, ù tiah gơ gơs lơngơm rlau tai. Năc tus sền uă ngan mơya kung gam geh rơndăp tăp sèng tàm pơdar den tàng ờ gơlik geh bơta gơ kòl”.

Tàm tiah do, tơl nơm ñàng geh chu là dùl jơnau ưn ngài pơyoa tus ală cau kòn ù tiah Việt Nam dê neh ơm wơl tàm gùl dà lềng dờng. Pơgăp mờ do 38 nam, tàm ngai 14/3/1988, tàm ală ƀlàng lŭ Gạc Ma, Cô Lin mờ Len Đao gơwèt ƀồt dờng Trường Sa, càr Khánh Hoà, kwang bàng, cau ling Ling dà lềng Làng bol Việt Nam neh tam lơh jơh nùs kơ̆ dơn nàng sền gàr gơnoar tờm Dà lơgar dê.

 Tŭ do, nùs nhơm hơ̆ kung gam pơn jat tai geh tơngkah mờ lơh gơrề uă bơh tơl dơ̆ rê wơl Tiah kah kơlôi Gạc Ma. Bi Trần Đăng Đức, làng bol ơm tàm bồt Cam Ranh, càr Khánh Hòa pà gĭt: “Do là dùl bơhiàn ờs mờng bơh yau bơh kông ty dê. Nam lơi bol añ kung tus dan gơnoar geh kun bồ kah kơlôi, chu ñàng kah kơlôi ală cau kòn bơh dà lơgar dê neh chơ̆t phi să. Bơh hơ̆, tơngŏ nùs nhơm gĭt ưn ngài mờ kơ̆p kờñ dà lơgar sùm lơngăp lơngai, bơtàu tơnguh, is ồn là tàm tiah dà lềng bồt bơlào mờ ƀlàng rơndeh par”.

Kir sơnrai bè Gạc Ma gam là kir sơnrai dờng màng bơh uă hìu bơnhă geh cau pròc mhàm bal neh chơ̆t phi să tàm tiah dà lềng bồt bơlào. Bơta phi să bơh ală bi dê ờ mìng geh cih kah tàm kah yau lơm mờ gam gơ gơs bơta gơn kơnờm nàng ală rơnàng tŭ do in cơnđoà lòt jat bèp bi, sền gàr tơl tấk ù, dà lềng bơh Dà lơgar dê.

Mờ ală cau kòn bơh ală cau ling chơ̆t màng Gạc Ma dê, kir sơnrai bè bèp bi ờ mìng là jơnau yal kah yau lơm mờ gam là bơta pơn yờ să mờ kơnòl tàm pơrdờn bơhiàn ờs mờng. Uă cau neh rơwah gùng lòt drơng broă tàm mpồl ling klàng, pơn jat tai tă pơgồp dà kờl hề rơnàng kơnòm să dê ai broă lơh sền gàr gơnoar tờm dà lềng bồt bơlào. Bi Trần Thị Thủy, gam lơh broă tàm Lữ đoàn 146 – Trường Sa, kòn ùr Cau ling khin cha jak chài, cau ling chơ̆t màng Trần Văn Phương pà gĭt: “Sơnam kơnòm să bơh bèp añ dê bal mờ cau ling bal neh tuh mhàm ntìng tàm tiah dà lềng nàng sền gàr Dà lơgar, sền gàr tơl tấk ù dờng màng bơh lơgar Việt Nam dê. Să tờm añ gam ơm tàm sơnam kơnòm să, gam uă bơta jơh nùs, den tàng kơ̆p kờñ geh pơgồp dà kơl hề bơta pràn bơh he dê ai broă lơh sền gàr Dà lơgar mờ gơnoar tờm dà lềng bồt bơlào”.

Ờ mìng là tiah kah ưn ngài ală cau ling khin cha jak chài cau ling chơ̆t màng, Tiah kah kơlôi cau ling Gạc Ma gam là ù tiah tam lơh bơto bơtê bơhiàn yau ai uă mpồl ling phàu crong in, is ồn là kwang bàng, cau ling kơnòm să. Uă mpồl ling gơwèt Ling dà lềng Làng bol Việt Nam sùm lam ai mpồl ling in tus pơdơng chu ñàng, lòt sền, jòi gĭt kah yau nàng bơtơl tai nùs nhơm pơn yờ să mờ nùs nhơm sền gàr gơnoar tờm dà lềng bồt bơlào. Bơh ală broă lơh tàm do, tơl nă kwang bàng, cau ling sơlơ wă uă ngan bơta kwơ bơh ring lơngai dê, bơh hơ̆ pơn jat tai đòm jat niam bơhiàn cau ling khin cha jak chài, lơh ngan pơlam tàp jak, crăp rcang tam lơh uă, jơh nùs lơh ngan sền gàr kơ̆ kơnhăp gơnoar tờm dà lềng, bồt dờng màng bơh Dà lơgar dê. Trung tá Dương Trọng Hà, Ƀí thư Đoàn ƀòn lơgar Trung đoàn 196 pà gĭt:“Chu ñàng, kah kơlôi, tus sền bơto bơtê tàm Tiah kah kơlôi là broă lơh sùm bơh Trung đoàn 196 dê. Is ồn là gơwèt mờ kwang bàng, cau ling pa rê mờ mpồl ling rơ̆p gĭt geh bơhiàn ờs mờng bơh Mpồl ling klàng, Quân củñ mờ ală krơh niam cau ling khin cha jak chài, cau ling chơ̆t màng neh khin cha tam lơh, chơ̆t phi să. Gàr niam ai ală kwang bàng, cau ling kơ̆ pràn cíñ trị, bồ tơngoh, nùs nhơm pin dờn mờ nùs nhơm jơh nùs lơh ngan nàng bơsong kal ke”.

38 nam neh lòt gan, mơya jơnau sơntơm să gàr bồt nam lơi kung gam mpoong dờng tàm tiah tàm gùl dà lềng. Bơh Tiah kah kơlôi Gạc Ma tŭ do, nùs nhơm hơ̆ rơ̆p pơn jat tai geh mblàng lời wơl ai ală rơnàng in, nàng ală cau ling tiah lam lài in sùm gàr kơ̆ tê ià ngkơr phàu, sền gàr gơnoar tờm dà lềng bồt bơlào dờng màng bơh Dà lơgar dê.