
Nam bơsram 2024-2025, dơ̆ sơnrờp kơnờm bơsram ơdŭ 12 lơh gơs Broă bơsram kấp pe nam 2018, mờ ală tam gơl geh nùs nhơm tờm ngan, bơh broă ai geh gùng dà tơn wèt tơngu me tus mờ broă bơtàu tơnguh bơta niam bal mờ bơta pràn cau bơsram dê. Kung tàm nam do, dơ̆ pơrlòng jơh bơsram kấp pe geh tam gơl bè tơngu me pơrlòng bal mờ broă pơrlòng, tàm hơ̆ ală môn pơrlòng trắc nghiệm geh bơtơl tai ờ uă jơnau lùp pa, nàng tơnguh bơta tam pà bal mờ sền di bơta ngăc ngar kơnờm bơsram dê. Oh Lê Minh Hưng, bơsram ơdŭ 12, Hìu bơsram kấp pa Buôn Ma Thuột, càr Dăk Lăk tơlik nùs nhơm mờ đơs bè do: “Tơngu me jơnau pơrlòng nam do tam gơl uă, tàm hơ̆ uă ngan là môn tơrgùm bal. Oh gŏ he pal bơsram mờ bơsram wơl uă bơta jơnau lùp rơlao, nàng git wă jơnau tờm, mờ pal geh bồ tơngoh kơlôi sơnơng uă. Bŭ lah cau pơgru dong kờl uă, mơya oh kung gam gŏ pal lơh ngan tài do là dơ̆ pơrlòng kwơ màng tàm rài kis tơnơ̆ do oh dê”.

Tŭ do, ală hìu bơsram tàm càr Dăk Lăk gam mŭt tàm tơngai lơh ngan bơsram wơl ai ală kơnòm bơsram ơdŭ 12 in. Pơgru tơrgùm sền wơl jơnau git wă, sền wơl jơnau ngăc ngar lơh jơnau pơrlòng mhar mờ di jăt jơnau kờñ pa bơh tơngu me pơrlòng dê, dong kờl kơnòm bơsram tŭ lơi kung rơcang lài mŭt tàm dơ̆ pơrlòng. Mò Nguyễn Thị Xuân Hương, Atbồ Hìu bơsram kấp pe Lê Quý Đôn, ƀòn dờng Buôn Ma Thuột pà git: Hìu bơsram neh bơyai lơh uă dơ̆ pơrlòng nàng sền wơl, tam cah kơnòm bơsram nàng bơyai lơh bơsram wơl jăp mpồl, pơgồp bal tàm broă lơh tơrmù kal ke mờ tơnguh cồng nha broă bơsram wơl jơnau bơsram dê. Pa do, kơnờm bơsram neh tus bal dơ̆ pơrlòng tơrlòng lài jơh bơsram kấp pe nam 2025 geh Sờh Bơto bơtê mờ Bơsram bơyai lơh. Do là bơta niam nàng ală kơnòm bơsram lơh mờng mờ tơngu me pơrlòng bal mờ nùs nhơm tàm jơdŭ pơrlòng jăt broă lơh pa. “Dơ̆ pơrlòng do kờñ sền wơl cồng nha bơsram sră kung bè cồng nha bơsram sră tàm hìu bơsram dê nàng hìu bơsram geh ală jơnau mblàng lơh niam wơl jơnau sồr bè bơto bơtê tàm hìu bơsram dê, nàng di pal rơlao, geh jăt jơnau kờñ tơn bơh sơnrờp nam bơsram hơ̆ là dùl nam bơsram wèt tus kơnờm bơsram geh khà jơh bơsram 100%, bơh tŭ hơ̆ ală kơnòm bơsram geh bơta niam mŭt tàm hìu bơsram dờng rơlao mờ ală kơnòm bơsram kơ̆p kờñ”.

Tàm ală hìu bơsram gơwèt tiah ngài, tiah nhàr lơgar, do là tiah geh uă là kơnòm bơsram jơi bơtiàn ờ gal cau, broă bơsram wơl jơnau bơsram geh lơh ndrờm bal nàng di pal mờ bơta kờñ mùl màl. Ồng Nguyễn Phan Anh, Phó Kwang lam bồ Hìu bơsram kấp pe Lăk, kơnhoàl Lăk, càr Dăk Lăk pà git, tàm tơngai mờr tus do, bơdìh mờ broă lơh ngan bơsram wơl jơnau neh bơsram, ală cau pơgru sền kwơ tàm broă ai geh bơta pràn nùs nhơm kơnòm bơsram in. Jăt mờ hơ̆, hìu bơsram neh sền wơl, tam cah is kơnờm bơsram nàng lơh geh broă rơndăp bơsram wơl jơnau neh bơsram, dong kờl ală kơnòm bơsram pin dờn mŭt tàm dơ̆ pơrlòng niam. “Tơnơ̆ mờ tŭ pơrlòng tơrlòng lài jơh, hìu bơsram sồr bơsram wơl jơnau bơsram nàng ală kơnòm bơsram in bơsram wơl tàm tơngai 4 poh. Kờp dŭ bơh ngai 20 nhai 5 tus ngai 20 nhai 6 tơrgùm jơh ală kơnờm bơsram geh bơta ngăc ngar tàm broă bơsram sră ờ hềt kơl jăp mờ ơdŭ 12 den ai nàng ală kơnòm bơsram in geh tai 4 poh nàng bơsram wơl jơnau bơsram tàm hìu bơsram tơn”.

Dơ̆ pơrlòng jơh bơsram kấp pe nam 2025, càr Dăk Lăk geh mờr 22 rơbô nă cau pơrlòng dan cih măt tus pơrlòng. Ồng Đỗ Tường Hiệp, Phó Kwang lam bồ Sờh Bơto bơtê mờ Bơsram càr Dăk Lăk pà git, Sờh do neh sồr ală hìu bơsram sền wơl bơta niam dơ̆ pơrlòng nam lài, lơh geh tơngu me, sră nggal bal mờ broă rơndăp lơh bơsram wơl jơnau bơsram di pal mờ mùl màl bơh tơl hìu bơsram dê. Tàm hơ̆ uă ngan là tŭ Jơnau sồr sồ 29 bơh Ƀộ Bơto bơtê mờ Bơsram geh ngui, ală hìu bơsram neh geh gùng dà broă bơsram wơl jơnau bơsram jăt broă lơh tơrmù bơta kal ke, tơnguh cồng nha. Ồng Đỗ Tường Hiệp đơs nền, gah bơto bơtê neh sồr ală hìu bơsram cih măt ală kơnòm bơsram geh rài kis gơtìp kal ke nàng geh dong kờl di tŭ, bañ lời geh cau pơrlòng lơi pal sơrbì dơ̆ pơrlòng do. “Sồr ală hìu bơsram lơh geh jơnau bơtơl broă rơndăp lơh bơto bơsram tàm hìu bơsram di pal mờ bơta geh mùl màl bơh hìu bơsram dê bal mờ kơnòm bơsram. Tŭ Jơnau sồr sồ 29 geh ngui, pal geh broă rơndăp lơh nàng hòi jà geh dùl mpồl cau pơgru bơto kơnòm bơsram in, ờ gŏ di bơsram tai bơto tai. Tàm hơ̆ uă ngan là gơwèt mờ ală kơnòm bơsram tàm tiah ngài, tiah làng bol jơi bơtiàn ờ gal cau den geh dong kờl ờ mìng bè đah nùs nhơm, bè broă bơsram sră mờ gam geh bal bè phan bơna nàng ală kơnòm bơsram geh tơl bơta niam ngan bơsram sră mờ pơrlòng geh niam ngan”.
Rơcang nền nòn, sền wơl di bơta pràn, bơta ngăc ngar kơnòm bơsram mờ lơh geh broă rơndăp lơh bơsram wơl jơnau bơsram di pal, gah Bơto bơtê mờ Bơsram càr Dăk Lăk gam lơh ngan nàng dơ̆ pơrlòng jơh bơsram kấp pe ờ mìng geh cồng nha bè broă bơto mờ bơsram, mờ gam lơh geh tai nùs nhơm pin dờn ai ală kơnòm bơsram in mŭt tàm dơ̆ pơrlòng geh uă bơta lòng mơya kung geh uă bơta niam rài tơnơ̆ do in.
Viết bình luận