Bơh ngai geh bơsram tàp ngui măi mok, ồng Phùng Ngọc Quát, atbồ ƀòn 6, thôn Cao Thành, sàh Ea Kao, ƀòn dờng Buôn Ma Thuột, càr Dăk Lăk ờ gam pal lòt jơng nàng tus tơl hìu tai nàng yal broă ƀòn lơgar. Mpồl Zalo ƀòn ồng dê geh lơh neh dong kờl ồng yal jơh ală tơngu me jơnau yal nàng ală cau tàm ƀòn in git, lơh jăt mờ geh jơnau lùp wơl: “Ală app VNeID ha là ală mpồl Zalo tàm ƀòn ƀuơn ngan nàng làng bol in git ală jơnau yal bơh sàh, tàm ƀòn pơyoa gơtùi yal tơn bơh app nàng ƀuơn wă bal, ha là geh ală broă pơrjum lơi tàm ƀòn, tàm sàh kung mhar rơlao, ờ hoan pal lòt yal tus tơl hìu, tơl nă cau tai”.

Măi mok sồ gơguh bơta ƀuơn, tềm pềr tơngai ai làng bol, mpồl lơh sa kă bro mờ ală anih lơh broă atbồ dà lơgar, pơgồp bal tàm broă tơnguh cồng nha broă lơh… Mơya tàm càr Dăk Lăk mờ uă cau, cồng nha bơh măi mok do tàm broă lơh jăt ală broă lơh dà lơgar là ờ hềt di jăt mờ jơnau kơ̆p kờñ. Mò Đào Thị Mai, kis tàm sơnah ƀòn Tân Lợi, ƀòn dờng Buôn Ma Thuột pà git: “Añ ờ hềt ngui măi mok, ngui sră nggal bè ù tiah den tàng añ kung kơ̆p kờñ anih lơh broă dà lơgar bal mờ đah măi mok dong kờl añ bè broă do, bè mblàng yal mờ yal uă tàm làng bol in git ngui măi mok sồ tàm broă lơh nàng ờ hoan roh tơngai, broă lòt rê ai làng bol in”.

Nàng tơrmù bơta ờ ndrờm bal bè jơnau git wă ngui măi mok bơh ală cau tàm ƀòn dê, càr Dăk Lăk neh lơh geh rơlao 2 rơbô mpồl măi mok pa mpồl bơtiàn mờ mờr 12 rơbô nă cau tus bal. geh uă ngan tàm khà do là ală cau kơnòm, jơh nùs mờ broă lơh, cèng măi mok nàng lòt bơto tus tơl hìu làng bol in. Bi Nguyễn Văn Mạnh, cau tàm mpồl măi mok mpồl bơtiàn sàh Ea Ninh, kơnhoàl Cư̆ Kuiñ pà git: “Gơwèt mờ broă lơh bơ̆t bơtàu mpồl bơtiàn sồ, bol añ gam lơh broă mblàng yal tơn mờ broă lơh kong rơndeh mblàng yal, lơh pràn broă lơh tơm priă mờ điện tử kung bè ală jơnau yal bè tus bal tam gơl sồ, lơh broă tơm priă điện tử geh kwơ tơn tus bal mờ ờ uă tơngu me bol añ gam lơh geh nùs nhơm lơh broă bal geh cồng nha”.

Lơh broă bal mờ làng bol gam geh ală mpồl lơh sa kă bro viễn thông. Ồng Nguyễn Văn Thản, Phó kwang lam bồ VNPT Dăk Lăk pà git, bal mờ ală mpồl lơh sa kă bro tàm gah VNPT Dăk Lăk neh lơh gơs broă gơglòm internet 4G gùt càr, gùng che internet kung neh geh lơh tus tơl hìu nhă. Mờ mpồl lơh broă kung tus bal bơto ai kwang bàng kấp kơnhoàl mờ ală mpồl lơh broă măi mok pa mpồl bơtiàn nàng ală cau do in git ală bơta tờm măi mok, drơng broă mblàng yal mờ bơto sồr làng bol. “Tŭ do, VNPT neh tus bal bơto ală kwang bàng tàm kấp kơnhoàl, kwang bàng mpồl lơh broă măi mok mpồl bơtiàn nàng git ală bơta tờm măi mok pa drơng tàm broă mblàng yal tus làng bol bal mờ bơto sồr làng bol in tàm broă ngui. Tàm gah broă drơng ala dà lơgar, bol an gam lơh broă bal đah ală sờh, gah lơh broă bè dia, ală anih lơh broă sră nggal tàm gah ù tiah nàng ai tơl bơta ƀuơn làng bol in tàm broă lơh ală sră nggal tơrgùm bal, ƀuơn tàm tơngai tus”.

Càr Dăk Lăk ai jơnau kờñ tus lồi nam 2025, geh 80% kwang bàng, kông cứk git ngui măi mok pa; 70% làng bol cau dờng geh bơto bơtơl măi mok pa; 80% cau lơh broă tàm ală mpồl lơh sa kă bro, mpồl lơh broă bal git ngui măi mok drơng tàm broă lơh. Ồng Rah Lan Trương Thanh Hà, Phó kwang lam bồ Sờh Jak chài mờ Măi mok càr Dăk Lăk pà git, nàng lơh pràn broă tam gơl sồ, bơdìh mờ broă ai lài bơcri priă lơh phan bơna gah viễn thông, internet 4G/5G tàm ală tiah ngài, càr rơ̆p tơrgùm tơnguh uă bơta pràn kwang bàng tàm ală tiah, lơh pràn broă mblàng yal, tơnguh broă bơto măi mok pa tus tơl làng bol in. “Tàm tơngai tus, bol añ rơ̆p pơn jăt tai pơlam càr in ală gùng dà broă lơh bal mờ gùng dà broă lơh nàng lơh geh cồng nha bơh ală mpồl lơh broă măi mok mpồl bơtiàn, ală “cau bơto” bơh gơnoar atbồ bal mờ gah lơh broă dê, dong kờl làng bol in git mờ tus bal tàm broă tam gơl sồ”.

Kơnờm bơh ală broă lơh kơ̆ nùs, lơh sùm, măi mok sồ gam mùl màl gơs dùl bơnah tàm rài kis làng bol dê, bơh ƀòn ngài tus mờ ƀòn drà dờng. Mờ tơnơ̆ pah ngai, tàm càr Dăk Lăk geh ai uă làng bol gơs làng bol sồ, lơh geh dùl mpồl bơtiàn sồ tơl làm, niam chài kòn bơnus mờ geh cồng nha. Do là bơta lài ngan kwơ màng nàng càr lơh gơs gơnoar atbồ sồ, mpồl bơtiàn sồ, lơh sa sồ.