Kwang àng càr Dăk Lăk pà git, gùt càr neh sền, dờp tơrgùm jơnau yal bơh 12 rơbô 308 nă cau ling chơ̆t màng, tàm hơ̆ geh 5 rơbô 458 nă cau ling chơ̆t màng ờ hềt git đal măt. Bơh broă sền wơl tŭ do gŏ 3 rơbô 985 ƀồc cau ling chơ̆t màng gam cau pròc mhàm tơl bơta nàng tơrgùm mẫu ADN mờ kờp jơh khà geh 4 rơbô 346 nă.

Tàm dơ̆ sơnrờp, càr neh dờp rơlao 2 rơbô 400 mẫu sinh phẩm ADN. tàm dơ̆ bàr do, kờp dŭ dờp tơrgùm geh tai 1 rơbô 671 mẫu. Nàng broă dờp tơrgùm mẫu lơh geh cồng nha, Kwang àng càr Dăk Lăk neh pơgồp bal mờ ală gah, mpồl lơh broă geh gơnoar, gơnoar atbồ sàh, sơnah ƀòn sền wơl tơl nă cau, tus tơl hìu nhă nàng dờp tơrgùm jơnau yal, bơto sồr mờ mblàng yal broă lơh. Broă lơh do geh lơh nền nòn, tài tơl mẫu ADN ndrờm cèng geh jơnau kơ̆p gơn jòi gŏ wơl măt, ai ală cau ling chơ̆t màng rê mờ măt sơnđan mờ hìu nhă.