Bơh dùl nam lam lơh broă lơh pràn bơsram mờ lơh jat bồ tơngoh, nùs nhơm, niam chài rài kis Hồ Chí Minh, sàh pôs đồng kăc màng Ea M’Droh, càr Dăk Lăk tơrgùm lam lơh bàr broă lơh: “Ròng sur ù mờ lơh jat ngan ngồn tềm pềr”, “Tơl chi bộ lòt bal mờ hìu bơnhă làng bol lik klàs rƀah”. Kwang bàng, đảng viên tă pơgồp kes priă tềm pềr, ală chi bộ dờp dong kờl tơl hìu bơnhă mờ ală broă lơh mùl màl.

Tàm nam lài, broă tềm pềr 1 rbô đong dùl nă cau dùl ngai neh lơh geh kes priă rlau 99 tơlak đong. Broă lơh ròng sur ù nam 2025 hòi jà tă pơgồp geh mờr 128 tơlak đong. Pơgồp bal ală kes priă mờ priă jền dong kờl ndai, sàh Ea M’Droh neh dong kờl 5 broă lơh tơrlòng lài broă lơh broă sa, lơh pa mờ lơh niam wơl 5 nơm hìu, dong kờl nisơna 11 hìu bơnhă.

Tàm pơrjum ngai 12/11, ala mat 27 chi bộ tàm Đảng bộ sàh bơyai lơh pờng sur ù nam 2026, ai geh rlau 152 tơlak đong. Ală bơnah tă pơgồp dềt geh tơrgùm wơl gơ gơs kes priă nàng dong kờl cau kal ke. Ồng Nguyễn Văn Hào, Lam bồ thôn Hiệp Kết, sàh Ea M’Droh yal: “Broă lơh tơrlòng lài ròng sur ù do là broă lơh tơrlòng lài lam lơh hòi jà niam ngan, tơl nă làng bol mìng kờñ tềm pềr dùl ngai 1 rbô đong den neh geh khà priă dờng ngan nàng dong kờl ală cau kal ke, cau rƀah nă să is, lơh gơlik bơta niam dong kờl khi sơrlèt gan tơl bơta kal ke tàm rài kis. Añ gŏ broă lơh do kung pal geh gơ rề uă rlau tai”.

Bal mờ tă pơgồp kes priă, sàh Ea M’Droh lam lơh tơrlòng lài broă lơh “Tơl chi bộ lòt bal mờ hìu bơnhă làng bol lik klàs rƀah” tàm 4 chi bộ: Ală anih lơh broă Đảng, Anih duh broă làng bol sàh, Kwang àng mờ Ling klàng. Tơl chi bộ dờp dong kờl êt ngan bơh 1 hìu bơnhă, jòi git bè rài kis mùl màl nàng rơ wah broă dong kờl. Geh hìu bơnhă geh dong kờl kơnrồ sơntìl, lơh hìu; geh hìu bơnhă den geh đảng viên ai jồm ù nàng lơh gơlik tai priă jền.

Ồng Trần Doãn Tới, Bí thư Anih duh broă đơng lam Đảng sàh Ea M’Droh pà git, tơnơ̆ sền wơl, sàh pờ ơnàng broă lơh tơrlòng lài gơ gơs tơl mpồl bal, mpồl lơh sa kă bro lòt bal mờ hìu bơnhă rƀah: “Bơh broă lơh tơrlòng lài hơ̆ den bol hi lơh nền lam lơh uă, ờ mìng là mpồl lơh broă Đảng gơ wèt Đảng bộ mờ gam gơ rề tus ală mpồl duh broă gah jat yàng, ală mpồl lơh sa kă bro, ală cau geh nùs nhơm niam, cau nă să is tàm sàh mờ bơdìh sàh, tàm càr mờ bơdìh càr nàng bal mờ gơp sơmbat tê bal mờ sàh Ea M’Droh tàm broă lơh gơs broă jàu Jơnau lơh nền tàm pơrjum dờng Đảng ƀộ sàh dơ̆ dùl là tus nam 2030 sàh Ea M’Droh rơp ờ gam hìu bơnhă rƀah mờ ndrờm bè cau rƀah tai”.