Jat broă rơndap lơh geh yal, rơndap broă lơh geh lam lơh bơh tŭ do tus nam 2035, tam pà gơs bàr tŭ tơngai, mờ kờp jơh priă bơcri kờp dŭ rlau 214 tơmàn đong. 

Tơngai bơh nam 2026 tus nam 2030, kờp dŭ bơcri mờr 135 tơmàn đong nàng lơh niam gùng lòt tàm tiah làng bol ơm kis, tiah lơh sa; lơh hìu bơsram mẫu giáo, phân hiệu hìu bơsram kâp 1, hìu sơnơm sàh, hìu pơrjum mpồl bơtiàn mờ hìu lơh broă thôn. Rơndap broă lơh kung dong kờl rơndap sap sèng, gàr kơ̆ 50 hìu bơnhă làng bol, lơh hìu ơm, rồ ù lơh sa, bơtaù tơnguh tam kòi sre, chi tam lơyah ngai mờ dong kờl sơntìl chi tam, phan ròng. Tơngai bơh nam 2030 tus nam 2035, kờp dŭ bơcri 79 tơmàn đong nàng pơn jat tai rơndap, gàr kơ̆ 50 hìu bơnhă làng bol pơgồp bal mờ dong kờl hìu ơm, rồ ù lơh sa mờ bơtàu tơnguh lơh broă lơh sa.