Tàm sàh Bảo Lâm 1, nùs nhơm ring bal bơh làng bol dê gam pơgồp bal tàm broă bơsong geh dùl tàm ală kal ke dờng màng ngan tŭ lơh ală broă lơh gùng lòt: ai geh bă ù nàng lơh. Uă hìu rơcang lài tă sờr pơngàr, broă lơh tềng đăp hìu nàng jào ù drơng tàm broă lơh gùng lòt. Geh ală hìu nhă pal tă khà priă uă ngan nàng lơh wơl, lơh niam, mơya kung gam chờ hờp mờ dùl nùs bal tài bơta kwơ jŏ jòng mờ broă lơh do geh cèng wơl. Mò Cao Thị Nghệ, tàm sàh Bảo Lâm 1 tơlik nùs nhơm bè do: “Bŭ lah roh mờr 100 tơlăk đong, añ kung gam di nùs bal sơl. Oh mi lơh gùng kung jơh nùs bal sơl, lơh ngai kung bè mang, trồ mìu càl dờng kung gam lơh sơl”.

Bơta dùl nùs bal bơh làng bol dê neh dong kờl bơsong kal ke bè ù tiah, ai tơl bơta ƀuơn nàng cau dờp lơh gùng tơrgùm cau, măi mok mờ phan bơna nàng lơh. Tàm ală gơl gùng drơng tàm broă lơh sa suơn sre, broă tơrmù tơngai lơh sơlơ geh kwơ màng ngan tŭ làng bol mờr tus kàl tơnhào kơphe. Ồng Lê Quang Tuấn, ala măt mpồl lơh gùng pà git: “Bol añ tơrgùm cau lơh, măi mok, phan lơh broă, rơcang tơl phan nàng lơh mhar broă lơh gùng. Oh mi bơyai tơnguh tơngai lơh, geh bal mang, lơh ngan nàng gờñ lơh gơs, ai broă lơh gùng geh ngui, dong kờl làng bol lòt rê ƀuơn tàm kàl mìu mờ pơn diang kơphe tàm kàl tơnhào”.

Broă lơh ngan tơnguh tơngai lơh, tơnguh tŭ lơh bơh mpồl dờp lơh gùng dê bal mờ nùs nhơm ring bal jào ù bơh làng bol dê tai gam pơgồp bal tàm broă lơh ngan lơh gơs ală broă lơh. Do kung là ală bơta tờm kwơ màng tŭ càr Lâm Đồng mŭt tàm tơngai lơh mhar ai priă bơcri bơh dà lơgar dê tàm nam 2026. Ồng Trần Đình Phước, Phó Chủ tịch Anih duh broă Làng bol sàh Bảo Lâm 1 đơs là, broă ring bal bơh làng bol là bơta tờm kwơ màng nàng bơsong kal ke bè ù tiah, lơh mhar broă lơh gùng mờ ai priă bơcri bơh dà lơgar dê: “Nàng ai geh nùs nhơm ring bal, bol añ neh pơgồp bal mờ ală cơl dŭ lơh broă tàm do, mpồl lơh broă pơlam bơyai lơh pơrjum làng bol, lam ală hìu hơ tă sờr broă lơh, jào ù. Geh ală hìu pal tă sờr jơh bơnah hìu rềp tềng gùng, pơngàr tàm bă ù dờng ơnàng, mơya làng bol kung gam kờñ bal nàng broă lơh gùng gờñ geh lơh, lơh mhar broă ai priă bơcri dà lơgar”.