Tàm ală ngai do, cau lơh broă tềng gơl gùng tơrbŏ bal kơnhoàl Mang Yang mờ Ia Pa lơh broă sùm, mơya gơl gùng jòng 33 kơi sồ, priă tă lơh rơlao 195 tơmàn đong kung gam lơyài jăt mờ tơngai geh ai. Mŭt lơh bơh nhai 11 nam 2023 mờ kờp dŭ geh lơh gơs tàm nhai 01 nam 2026, mơya tài geh uă bă tiah ờ hềt geh tơm ntrờn ù tiah, lơh cau dờp lơh gùng ờ gơtùi lơh. Ồng Krung Dam Đoàn, Phó Củ tịc Anih duh broă làng bol kơnhoàl Mang Yang pà git, uă bă tiah pal tơm ntrờn ù tiah mơya ù ờ hềt geh khà priă mùl màl: “Broă tơm ntrờn ù tiah gơrềng tus 33 hìu làng bol, lòt gan 3 sàh: Kon Thụp, Đăk Djrăng mờ Lơ Pang (kơnhoàl Mang Yang). Tŭ do gam geh ờ uă tiah pal geh priă ù mùl màl den hơ̆ sồng Anih duh broă làng bol kơnhoàl neh pơgồp bal mờ mpồl cau tờm bơcri priă lơh nàng lơh mhar ală sră nggal, gờñ geh priă ù mùl màl nàng ngui priă ù loh làng ai làng bol in, gàr niam di jăt jơnau geh ai bơh adăt boh lam dê”.

Bè đah cau tờm bơcri priă, ồng Nguyễn Hữu Sơn, drơng broă Cơl dŭ lơh broă Atbồ rơndăp broă sồ 01 gơwèt (Mpồl atbồ ală rơndăp broă bơcri priă bơ̆t bơtàu càr Gia Lai) pà git, tus tŭ do, mpồl lơh tàm gơl gùng do mìng rơ̆p geh mờr 61% rơndăp broă geh ai. Mpồl rơ̆p lơh ngan bơsong ală gơkòl mờ lơh ngan lơh gơs gơl gùng do lài mờ ngai 30 nhai 8. "Broă pơgồp bal là Mpồl sùm ai cau tus lơh broă mờ Mpồl duh broă tơm ntrờn ù tiah mờ Anih duh broă làng bol kơnhoàl Mang Yang nàng tàm broă lơh di lah gơkòl bơta lơi den bơsong mhar tơn. Mpồl kung lơh ngan mờ sồr ală cau lơh gùng tơrgùm phan, măi mok, cau lơh broă bal mờ phan lơh broă nàng lơh mhar broă lơh gơs gùng di mờ tơngai neh geh ai”.

Rơndăp broă lơh Ƀòn ơm kis gùng Nguyễn Văn Linh (ƀòn dờng Pleiku) kung gam lơyài jăt mờ tơngai geh ai tài ờ hềt tơm ntrờn ù tiah sơl. Rơndăp broă lơh do kờp jơh priă bơcri 260 tơmàn đong, ngui kes priă dà lơgar bal mờ kờp dŭ geh lơh gơs bơh nam 2022 tus 2025. Mơya, tàm bơta mùl màl tus tŭ do mìng rơ̆p lơh gơs mờr 60%. Tàm broă kờp jơh bă ù ơnàng mờr 40 lồ pal toh wơl, mìng geh di pơgăp 24 lồ ù geh ring bal mờ gùng dà broă tơm bơtơl… Bơh tàm ală bơta mùl màl do, Anih duh broă làng bol càr Gia Lai neh tơlik sră nggal sồr ală mpồl lơh broă gơrềng bal tus sền, bơsong bơta kal ke mờ lơh mhar ală broă lơh. Ồng Nguyễn Hữu Quế, Phó Củ tịc Anih duh broă làng bol càr Gia Lai bal mờ ală gah, mpồl lơh broă, ală tiah neh mhar tus sền mờ di tŭ geh ală jơnau sồr lơh nàng bơsong tàm ală broă lơh; lơh mhar broă lơh tàm ală tiah neh geh ù, gàr niam tơngai lơh bal mờ rơcang tơl ală bơta niam nàng tam gơl ală rơndăp broă lơh mŭt tàm tơngai pa. “Kơnòl bè broă mblàng yal tơm ntrờn ù tiah là bơh ală kấp gơnoar atbồ dê. Tus tìp tơl nă cau nàng mblàng, geh ală cau pal lơh ngan bơrklơn, tŭ lơh gŏ gơtìp gơkờl den pal yal tus Anih duh broă làng bol càr nàng dan geh jơnau sồr mờ ai tơlik nùs nhơm bơh să tờm dê là, lơh bè hơ̆ là cèng geh bơta kwơ ai dà lơgar in, cèng geh bơta kwơ làng bol in den dan Anih duh broă làng bol càr sền sơwìh mờ ai geh jơnau đơs. Pal ai tơngŏ nùs nhơm geh kơnòl, tơngai bè neh geh ai nàng lơh bè lơi lơh gơs gùng lòt nàng lơh jăt ală broă lơh pơn jăt tai”.

Broă Anih duh broă làng bol càr Gia Lai jal mhar lơh ală gùng dà broă lơh nàng gàr niam broă atbồ geh cồng nha ală broă lơh, rơndăp broă bơcri priă dà lơgar là jal mhar ngan tàm bơta rơndăp tăp sèng, lơh gơs mpồl lơh broă gơnoar atbồ ƀòn lơgar. Broă geh Anih duh broă làng bol càr Gia Lai sồr tơrgùm sền wơl là ală rơndăp broă bvơcri priă dà lơgar gơwèt broă rơndăp lơh di mơ tơngai bơh nam 2021 tus 2025, broă rơndăp lơh nam 2025 kung bè ală rơndăp broă pơn jăt tai. Mờ Anih duh broă làng bol càr sồr ală mpồl lơh broă gơrềng bal tơrgùm bơsong ală rơndăp broă lơh ờ hềt lơh gơs, ală rơndăp broă lơh geh khà priă jơnkah priă càn ing lài ờ hềt geh toh wơl mờ ală rơndăp broă neh geh kĭ bơcri priă lơh mơya ờ hềt tơl priă tơm. Nàng lơh mhar mờ gàr niam broă lơh geh sùm tàm broă atbồ, Anih duh broă làng bol càr Gai Lai neh sồr ală sờh, gah lơh broă bal mờ Anih duh broă làng bol ală kơnhoàl, ƀòn drà dờng, ƀòn dờng pal tam pà loh làng kơnòl, bơsong ală bơta gơkòl gơlik geh. Tàm hơ̆, gơwèt mờ ală broă bơ̆t bơtàu mờ lơh hìu lơh broă gơtìp gơrềng tài broă rơndăp tăp sèng wơl mpồl lơh broă, ală mpồl pal sền wơl, geh jơnau lơh wơl di pal nàng gàr geh cồng nha, tềm pềr priă tă, pleh mờ gơtìp hoàc huơr priă jền.