Gùt càr Lâm Đồng tŭ do geh 100 mpồl đảng tàm ală hìu bơsram đại học, cao đẳng, hìu bơsram kấp pe mờ rơlao 5 rơbô nă đảng viên; 138 mpồl đảng tàm tiah lơh sa cau dùl nă să lơh is mờ mờr 1 rơbô 750 nă đảng viên.

Bơh nhai 07 nam 2025 tus tŭ do, càr Lâm Đồng neh ai mŭt geh 878 nă đảng viên là kơnòm bơsram, cau bơsram dờng mờ 185 nă đảng viên tàm tiah lơh sa cau dùl nă să lơh is. Tàm pơrjum bơyai, ală cau ala măt cri bơyai bè broă lơh mờng chài, pơgồp jơnau đơs tàm gùng dà broă lơh nàng geh khà cau bơh gờñ tàm kơnòm bơsram, cau bơsram dờng; tơnguh broă pơgồp bal đah hìu bơsram mờ sàh, sơnah ƀòn; tam gơl pa gùng dà broă bơtàu tơnguh mpồl đảng, đảng viên tàm mpồl lơh sa kă bro cau dùl nă să lơh is.