Container kơphe tac hờ lơgar ndai dơ̆ do geh rlau 3,4 tấn kơphe bơkah, kờp priă mờr 120 rbô dolar Mỹ, là phan bơh Công ty Kong kơnòl nă să is Aeroco Coffee dê. Do là tŭ tơngai kuơmàng ngan tàm gùng lơh kă bro phan bơta kơphe Fine Robusta, tam gơl bơh tŭ tơngai yal tơnggit, sền swì bơta niam phan bơna gơ gơs rề ơnàng broă lơh kă bro mùl màl tàm lơgar Mỹ - dùl tàm ală drà kơphe dờng mờ geh bơta tàm pơrlòng uă tàm dunia.

Ồng  Nguyễn Tấn Vinh, cau geh jơnau git wă jrô bè kơphe bơkah đơs, kơphe bơkah tàm Dăk Lăk neh geh bơta bơtàu tơnguh uă ngan. Cơng tàng là Dơ̆ pơrlòng kơphe bơkah Việt Nam – Amazing Cup, bơh rlau 50 bơta phan tus bal pơrlòng tàm ală nam sơn rờp bơyai lơh bơh nam 2019, tus tŭ do neh gơguh tus rlau 200 bơta phan. Uă mpồl lơh sa kă bro neh tus bal jrô rlau tàm gah do mờ rơhời ai kơphe bơkah mut tàm drà ală lơgar. Jat ồng Vinh, Dăk Lăk geh uă bơta ƀuơn nàng tơnguh priă lơh geh gah lơh kơphe dê:

“Ală bơta pal geh nàng bơtàu tơnguh kơphe bơkah tàm Dăk Lăk neh mùl geh bơh jŏ ngan, hơ̆ là bơta tiơng pơn rơ bơh mat kă bro Buôn Ma Thuột dê. Dơ̆ 2 là tàm Dăk Lăk geh anih kơlôi sơnơng bè kơphe Robusta. Dơ̆ 3 là ù tiah kung bè bơta ờs mờng sơngka sền gàr jŏ rài làng bol dê. Ală bơta pal geh nàng bơtàu tơnguh gah lơh kơphe bơkah neh geh tơl. Bơta kuơmàng ngan rlau jơh tŭ do là Dăk Lăk rơp mblàng yal jơnau, pơlam gùng mờ geh bơta atbồ dà lơgar bè lơi nàng gah do bơtàu tơnguh pràn mờ kơ̆ rlau”.

Tàm dơ̆ tac hờ lơgar ndai kơphe bơkah uă jat sră pơrgon tus drà lơgar Mỹ, ồng Đỗ Đức Hà, Chủ tịch Anih duh broă Làng bol sơnah ƀòn Ea Kao kơp kơnờm broă lơh tơrlòng lài tam, lơh gơlik kơphe bơkah rơp lơh gơlik bơta gơn kơnờm nàng ală mpồl lơh broă bal, mpồl lơh sa kă bro kơlôi sơnơng, bơsram, pờ ơnàng, lơh gơlik tai broă lơh mờ tơnguh priă jền lơh geh ai cau tam kơphe in. Sơnah ƀòn Ea Kao geh git nền là dùl tàm ală anih tus lòt nhơl càr Dăk Lăk dê, den tàng ƀòn lơgar pơlam gùng tàm tơrbŏ bal ală tiah tam kơphe mờ broă lơh lòt nhơl, pơgồp bơnah yal tơnggit rùp hin kơphe Dăk Lăk tus nac lòt nhơl mờ gơp bơyô ală lơgar:

“Bol hi kơp kơnờm mat kă bro kơphe Aeroco đơs is mờ ală phan kơphe ndai bơh Ea Kao dê đơs bal rơp lòt bal mờ ală broă lơh lơh gơlik kơphe càr Dăk Lăk dê mờr tus nàng pơgồp bơnah yal tơnggit rùp hin kơphe Dăk Lăk dê tus drà kă bro ală lơgar”.