Drim ngai 11/11, tàm sơnah ƀòn Quy Nhơn Nam, càr Gia Lai, tài bơh mìu dờng, gĭt nđờ jơ̆t khối ù lŭ bal mờ tờm chi dờng nisơna tơrlah gơ hoài mù tus gơl dùng dà lơgar 1D. Mbè ù, lŭ glòm tàm mat gùng lơh gơ kòl gùng lòt rê tàm tơrbŏ bal mờ càr Dăk Lăk. Tơnơ̆ hơ̆ mơ, anih lơh broă geh gơnoar càr Gia Lai hòi jà mpồl cau, rơndeh cŏ ù mờ măi mok ờs ngui tus tiah gơbàn tơrlah nàng bơsong ù lŭ; mơkung kơryan, bơto pơlam rơndeh lòt jat gùng ndai.

Kung tàm Gùng dà lơgar 1D sơl, gùng koèl kơh Quy Hòa geh pơnggàr kơryan, ờ ai rơndeh rơndồ lòt rê tài bơh pơphìn tơrlah ù. Mpồl lơh broă lòt jòi mờ dong kờl rềs àr geh sồr tus rềp ală tiah tờm, crăp rcang dong kờl, rcang lài dong kờl ntrờn làng bol. Bơh mho ngai 11/11, gĭt nđờ rơbô nă kơnòm bơsram tàm sơnah ƀòn Quy Nhơn Bắc mờ ală sàh Canh Vinh, Tuy Phước neh geh ai ơm rlô bơsram tài bơh mìu dờng, dà tih gơguh uă, lơh pơhìn sơbơng roh tàm gùng lòt tus hìu bơsram.

Mìu sơr tàm 2 ngai do neh lơh dà tàm uă dà dờng, croh dà tàm tiah đah măt tơngai Lik càr Dăk Lăk gơguh tih, lơh gơbam uă ƀòn ơm kis. Tàm ală sàh Xuân Lãnh mờ Đồng Xuân, gơnoar atbồ sàh neh mhar ntrờn git nđờ rơhiang hìu làng bol mờ phan bơna tus tàm tiah niam lơngăp lơngai, mờ kơrian ală tiah gơbam dà tàm gùng 19C. tàm ală sàh Tuy An Tây mờ Đồng Xuân, geh ờ uă hìu bơsram neh ai kơnòm bơsram ơm ờ lòt bơsram.

Mpồl lơh broă geh gơnoar geh ai tus tàm ală tiah gơbam uă dà, tŭ lơi kung rơcang lài mờ ală bơta gơlik geh. Anih lơh broă yal lài bè trồ tiah yal broă di gơlan gơtìp dà cò, tơrlah ù tàm tiah kơh bơnơm mờ gơbam dà tàm ờ uă tiah thòng jăt gah dà dờng, croh dà tàm tiah đah măt tơngai Lik càr Dăk Lăk. Gơnoar atbồ mờ anih lơh broă geh gơnoar sồr làng bol tơnguh uă nùs nhơm rơcang lài, bañ lòt gan tàm ală tiah gơbam jrô dà, dà hòr jơn tăng, tàm hơ̆ uă ngan là tàm ală bơtơ̆t lìu dà tàm ală dà dờng, croh dà nàng gàr niam lơngăp lơngai.

 Mìu dờng jŏ jòng tàm uă tiah tàm càr Quảng Ngãi lơh gơbàn ngơr bam dà, tơrlah ù, tam cah is uă gơl gùng lòt rê. Tàm sàh Sơn Tây, gơl gùng Trường Sơn Đông gơlik geh 3 tiah tơrlah ù, lơh gơkòl gùng lòt bơh ngai 11/11. Tàm sàh Phước Giang, jơh 10 thôn ndrờm gơtìp ngơr bam dà, bàr pe tiah dà tih gơguh uă rlau 1,5 thơk. Ală mpồl lơh broă neh dong kờl làng bol tàm ală tiah ngơr jrô ntrờn tus tiah ơm lơngăp lơngai.

Tàm sàh Ngọc Linh, gơnoar atbồ tiah do neh mhar ntrờn 115 hìu bơnhă mờ 393 nă cau tus tiah ơm ing lơngăp lơngai. Pal kơlôi rcang ngan rlau jơh là tiah Đăk Rế gơlik geh uă rơdàng tềng bồ bơnơm, pơhìn tơn tus 96 hìu bơnhă ơm kis tềng hơđơm jơng bơnơm. Jơh ală hìu bơnhă làng bol do neh geh ntrờn tus tiah ơm pleh tàm jơnum pơrjum Anih duh broă Làng bol sàh dê.